Mbelwelto am he Duɗal Pulaar Mammaa Huley Dem to Likseyba
Ɓerɗe ƴerii gonɗi weltaare e yiyde ngal duɗal paayodinngal, sagataaɓe rewɓe fulɓe, yontaaɓe, wasorɓe leñol, jannguɓe pulaar ɗemngal mumen haa ndursi ine ndokkee seedanteeje to Likseyba.
Sikke alaa so ndii njeñtudi mawndi dañaama, ko maa hakkillaaji ndoga e Ceerno Mammaa DEM, yo Alla yurmo mo, yaafoo mo, haarna mo Aljanna, jaɓɓoo mo to ɓuri toowde e Aljannaaji.
Golle makko maayataa, majjataa e nder njuuteendi jamanuuji, ngam yarlitanaade mo leñol makko e rokkude ɗum fotde mum haa timmi. Ko ɗuum waɗi, kala ndee ɓamtaare pulaar haaloyaa o siftorte heen. Eɗen nduwoo ndee ngal ɗoo gollal wonata yeru haa gure men fof ñemmba, ndarna duɗe tiiɗɗe. En njettii denndaangal dariiɓe e oo ɗoo ñalawma haa dokkirgol seedanteeje ɗee ŋarɗiri nii. En mbaawaa waasde rewde e innde bandi men debbo ngenndiyanke, mo hono mum weeɓaani e worɓe, alaa ko haali e rewɓe, sabu tiiɗnaare mum e duɗal Likseyba ngal. Kanko fof e waasde haarde cellal, hojom e hojom fof o hirjintu, o waajoo, o wallita.
Ceerno Kaaw Baru, jaalal pulaar kerngal, ngal ngenndiyankaagal mum hesɗitta to bannge golle, miijooji lobbi, janngude e winndude e jannginde ɗemngal, kanko fof e hatojineede e jinndude, kono o seerataa e duñtude, semmbinde e hirjinde yontannde ndee yo janngu pulaar.
Ceerno Dooro Kudiyel, mo puɗɗii-mi anndude darnde mum e pulaar, gorko basorɗo to bannge ganndal e pinal e yarlitaare, njettoor keeriiɗo woodanii ɗum e ngartam ndañaɗam e ngal duɗal, daarorgal e duɗe pulaar.
Denndaangal dariiɓe haa ndii njeñtudi pattamlamiiri dañaa, njettaama, njuuraama, mbeltanaama kaaɗtudi.
Mi joofnira wiyde jannguɓe haa keɓi seedanteeje ɓee, yo ɓe tiiɗno ɓe ɓeyda jaŋde maɓɓe, ɓe ngannda ko heddii ko ɓe nganndaa e pulaar koo, ɓuri heewde e ko ɓe nganndi koo, ndee tawnoo jaŋde gasataa, ko maayo luggo ngo alaa kaaɗtudi.
Ndeen noon waɗde, en ceerataa e eeraade yontaaɓe leñol ngol fof, ndee ɓurata waɗtude hakkillaaji mumen e toŋtude jaŋde ɗemngal ngal, sabu ko ganndal woni ngalu paggeteendu nawroowu leñol yeeso haa ur.
Pooye pelle pulaar kuɓɓii, hoto docotte ŋakku.
Kuɗol Aamadu Tijjaani KAN, winndiyanke, wiɗtiyanke, kebloowo heblooɓe.
