Fedde Koode Ganndal Woolum Neere yuɓɓinii ñalɗi pinal pattamlami tuggi ñalnde 14 haa 17 ut 2026 to Woolum Neere. Tiitoonde ñalɗi ɗii ko Ndenten, ndenndinen jawɗeele ngam mahen Duɗal Pulaar to Woolum Neere.
Ñalɗi ɗii udditiraa ñalnde14 ut ndee ko golle laaɓal, pittugol wuro ngoo.
Ñalnde 15 ut ko seppo cosaan waɗaa, tuggi waktu 11 haa waktu 13. Geɗe pinal fulɓe keewɗe kolliraama ñalnde heen : ko wayi no jombaajo, cubalaagal, ndema, ngaynaaka, njulliyaagal… e gardagol hooreejo fedde ndee e taworeede yoga e gure bismaaɗe ko wayi no Fonndu, Siñtu Bummak, Ñaabiima e Gurel Cooga.
Caggal seppo ngoo ko aranɓe gure ɗee ndokkaa konngi. Kala ƴeftuɗo konngol hollirtu weltaare mum e ɗii ñalɗi pinal juɓɓinaaɗi, e yettude wuro ngoo.
Rewi heen ko haalannde hooreejo fedde ndee, Elimaan Aamadu Kan : caggal salminaango makko e bismaade hoɗɓe ko yettude denndaangal ɓiɗɗo Woolum Neere gonɗo heen e wuro hee, e caggal wuro ngoo ngam darnde mum e fotde mum he fedde Koode Ganndal Woolum Neere.
Fayndaare Fedde ndee ko riiwtude majjere e humanbinnaagu ngam toŋtude ɓamtaare renndo. Aɓe eɓɓi dañde leydi e mahde heen duɗal. Ɓe ndañii jannginde daawe tati, ko hikka waɗi duuɓi ɗiɗi ko duɗal ngal udditi : sukaaɓe ne njannga he duɗal ngal, kala cukalel yoɓata lewru kala ko 2 000 mbuuɗu. Jannginoowo oo ine heɓa ndaamordi mum kala lewru. Ballal ine ɗaɓɓaa e leñol hee kala.
Caggal ɗuum waɗaa ko wejo ñameele ganni ko wayi no yari ŋoŋa, laru bettel, kodde ñebbe, kodde cammbel, ñiiri buna… Nde yahi haa jamma waɗaa ko hiirde naalankaagal tawi ko Ndey Kummba e diɗɗal mum Fooyre ngenndi mbelni hiirde ndee no haanirta nii.
Ñalnde 16 ut 2026, dawraa ko heblo Huufo Ngalu wonannde jom koppe en tuggi w9 haa w14, tawi heblatnoo rewɓe ɓee ko Ceerno Malal Sammba Gise. Kikiiɗe mum waɗaa ko yeewtere Nafoore Janngude e janngirde ɗemngal Nehniwal tawi yeewti ɗum ko Aamadu Aliw Soh wondude e duuso Goomu Pinal Koode Ganndal Woolum Neere. Nde yahi haa woni w 00 hiirde naalankaagal fuɗɗii e gardagol Ndey Kummba Jah e diɗɗal Fooyre ngenndi, haa w 03 jamma.
Ñalnde 17 ut 2026 dawraa kadi ko jokkude heblo huufo ngalu. Kiikiiɗe mum waɗaa ko hiirde pinal e mbaynondiral hakkunde terɗe fedde ndee.
Fedde ndee ina rutta teddungal fayde e ɓesngu wuro ngoo e gure nootinooɗe e kala baɗnooɗo heen mbuuɗu mum, doole mum, miijo mum haa golle ɗee mbaawi laataade.
Abuu Kan, kalfinaaɗo Kumpital FƁPM
