Nde o sankii ndee, Tuunus suniima ñalawma, Alaseri lelnii raay mum balɗe jeetati, to Palestiin, o woyaama no feewi. Mahmuud Abbaas wiyi « Manndelaa ko maande dimɗingol ɓesnguuji e njiimaandi koloñaal. Ko baasal mawngal wonande ɓesnguuji winndere ndee kala, haa arti noon e Palestiin ».
Manndelaa ina heewnoo nawdude hare mum en to Afrik worgo e hare ɓesngu Palestiin. Ko ɗum addaannoo mo wiyde “a min nganndi wellitaare amen timmataa so ɓesngu Palestiin rimɗaani ».
Hakkunde makko e Alaseri kadi ko jotondiral keeringal. Konngol Alaseri feewde e Manndelaa : “Mbayniigu jam Manndelaa : Alaseri waasii musiɗɗo”. Ndaw ko haani, sibu ko Alaseri o ekkii koninkaagu e hitaande 1961 e nder lasi ALN (konu Ndimaagu Alaseri) e gardagol seneraal Lamari. Ko ngaal musiɗɗaagal hakkunde Manndelaa e Lamari jibini jokkondiral hakkunde ANC e Alaseri. Ko ɗum rewnoo haa Alaseri, nde ardii Batu kuɓtodinngu Fedde Ngenndiije, yaltini jooɗaniiɗo Apartaayd saal joɗnde ndee.
Nde Manndelaa yalti kasoo, Alaseri ina jeyaa e leyɗe ɗe o idii yillaade. Ko ndeen o wiynoo “Ko Alaseri waɗi mi gorko ». To Tuunus kadi, Moncef Marsuki haalii ko heewi e Manndelaa , haa o wiyi, ko kañum yaltini mo kasoo, sibu ko nde o yillii Tuunus e hitaande 1994 ndee, o ɗaɓɓiri ɗum Ben Aali.
Manndelaa kadi ina jogodinoo jotondire moƴƴe hay e Kaddaafi, sibu Libi ina jeyaa e leyɗe ballittunooɗe hare ANC. 18 sulyee 2007, to Diiso hormaɓe winndere : « Eɗen ngollodoo ngam sompude cuusal ɗo kulol woni, semmbinde kaaldigal ko luural woni, e aawde yaakaare ɗo ɗamtindaare hoɗi ».
Bookara Aamadu Bah
