E nder FB 37 en kollitiino wonde koolol ngam ƴellitde Ñaañooru e nder pinal Fulɓe ina fotnoo yuɓɓineede ñande aset 27 e alet 28 saamwiyee 2007. E ooɗoo sahaa, en keɓii kabaaru wonde oo kewu pattamlamu e adunayankeewu dirtinaama haa hedde lewru Abiril e lewru Mee 2007 (ñalawma o dottaaka tawo). FB ina hollita on ɗo huunde e daartol Isaa Mbay Jaari Soh, gonɗo sabaabu haa Koolol ngol eɓɓaa. Isaa Mbay Jaari Soh jibinaa ko e hitaande 1947 to wuro Taal Bahale, nder Tunndu walla Ronndismaa Raaw, nder Falnde Daŋana, e nder Diiwaan Ndar (Saint-Louis du Sénégal). Ko o ñaañoowo ŋanaa, mo innde jayi hakkunde leɗeele kala, haa arti e leyɗeele Fulɓe.
Ko hedde 1960 naalankaagal makko e karallaagal makko penñiniri mo, mawniniri mo e innde Isaa MBay Jaari Soh. E nder Diɗɗal naalankaagal e pinal lollunoongal e ngal jimoowo ŋanaa ardinoo, hono Faadal Aysata, e wondude e Pennda Madam (cankiiɗo e cukaagu mum), ko Isaa MBay Jaari Soh wonnoo ñaañoowo maɓɓe.
Isaa Mbay Jaari Sow hawrii kadi e yonta naalankooɓe woɗɓe : hono Jibi Geɗal Bah (ñaañoowo) e Birom Njaay e Njaay Naybel Soh (yimooɓe e amooɓe). Hedde 1980, Isaa MBay Jaari Soh naati to Duɗal ngenndiyankeewal Naalankaagal Toowngal (Conservatoire National), o woni toon jannginoowo toowɗo ñaañooru (Porofesoor). O jannginii toon fotde duuɓi sappo e jeegom. E oon sahaa o yilliima e winndere ndee, haa teeŋti e leyɗeele hirnaange Afrik ɗee fof, e leydi Almaañ, e Farayse, e Pays-Bas, e Luxembourg, e Dowlaaji Amerik Dentuɗi (USA). O takkanaama galoŋaaji, o hokkaama teddungal wonde ɓiy leydi e gure USA keewɗe : hono Baltimore (1987), New-Diercy (1988), e Eurogone (1989). Gila o heɓi alateret makko, Isaa MBay Jaari Soh woni ko Orop, e nder leydi Belgique, to Bruxelles. Toon, o seeraani e gollaade e ko feewti e pinal, e naalankaagal, o seeraani kadi e jokkondirde e musiɗɗo makko gila hanki haa hannde, hono Faadal Aysata. Ko toon kadi miijo arani mo yuɓɓinde Koolol (festiwaal) ngam ƴellitde Ñaañooru e nder pinal Fulɓe, kam e nder aduna o fof, e ballondiral e Faadal Aysata e yoga e musiɗɓe maɓɓe, e yiɗɓe maɓɓe e nder winndere he. (Kala jiɗɗo ɓeydaade humpitaade geɗe koolol ngol (« festiwaal” o) ina waawi jokkondirde e ɓeeɗoo banndiraaɓe :
Isaa Mbay Jaari Soh, e Faadal Aysata Soh
