Abdullaay Wad toɗɗitiraa mawɗo leydi Senegaal laawol ɗimmol (ɗiɗmol). Tee alaa guli, sibu baɗtugol alaa. Wad ina yahra hannde e duuɓi 81. Ɓee ina mbiya o naywirii no feewi ardaade leydi, o fotnoo waɗde ko no Manndelaa nii, so laamaade laawol gootol woppana heddiiɓe … Ɓee ina mbiya hannde fof o ɓuri softande laamu …
Rewi e makko ko Idiriisa Sek, gonnooɗo cukalel makko, caggal oon ko Usmaan Tanoor Jeŋ, mawɗo parti sosiyaaliste, rewi e oon ko Mustafa Nias …
Jaŋde : Abdullaay ɓad janngii ko fayti e ganndal matematik hade mum faatude e jaŋde sariya haa wonti amwokaa. Omo jogii doktoraa ko fayti e ganndal faggudu.
Politik : e hitaande 1974 o sosi parti biyeteeɗo PDS (Parti Demokaraatik mo Senegaal), o toɗɗaa depitee e hitaande 1978. O wonii Jaagorɗo Dowla (Ministre d’Etat) e hitaande abriil 1991 e oktoobar 1992, caggal ɗum hakkunde 1994 e 1998. O wonii kanndidaa e woote gardagol leydi Senegaal e hitaande 1978, 1983, 1988 e 1993 hade makko foolde e hitaande 2000 Abdu Juuf.
Diine : Wad ko juulɗo battikiniiɗo Muriid en.
Ɓesngu : Wad resi ko debbo tuubaako Farayse biyeteeɗo Wiwiyaan (Viviane). Omo jogii sukaaɓe ɗiɗo : Karim e Sinjeli.
Ñaawoore : Nde o heɓi laamu nde, omo darji no feewi. Kono oon daraja ustiima kadi no feewi : won wiyooɓe o waɗaani ko o huninoo koo fof, won yooɓtortooɓe mo ñanngeende e dummbugol ɓurtungol ɓe jiidaa miijo yantude e tumamuyaaji mbuuñaari, walla waasde mo waawde muñde luural. Dumunna seeɗa caggal nde o heɓi laamu gadanol, o yaafii warnooɓe persidaa Diiso Sarɗinoowo (Conseil Constitutionnel) hono Me Babakar Sey. Jaayndiyanke biyeteeɗo Abdu Latiif Kulibali ina tuumi mo nii e warngo oon ñalnde 15 mee 1993. Ina feeñi noon wonde Wad umminii won ɗiin sañciyeeji mawɗi ngam ɓamtude daraja mum, ko wayi no mahngo laabi ekn, kono ɓesngu Senegaal tinaani no feewi so won ko waylii e nguurndam mum : ɓe ngalaa golle ɓeydiima heewde, baasal ɓeydiima yaajde. Eɗen nduwanoo ɓesngu Senegaal, nde oo ɗoo manndaa ɓurata ɓennuɗo oo, haa sukaaɓe mum natta soklude uujde fayde leyɗe goɗɗe.
