Waandu hocci yeewtere nde, wiyi : » Miin ne miɗa teskii geɗel, nde woodnoo ko mi koɗdiiɗo neɗɗo, sera wuro fof waɗata cukkiri, waɗataa puɗi barkinɗi no feewi, tee kadi a tawat jaaɓi maa, mi wiya leɗki ɓesnoowi mawki, keewki nafoore wonande aadee en e enen, ina waraa, ina waɗiraa gallol ko jibinta laawol gootol e hitaande, maaya, tawa noon leɗki ki ina waawi jibinde duuɓi noogaas tawa ko hitaande kala. Waɗooɓe ɗee ɗoo golle yo ƴeewto ko mbaɗata ko. Won ko min njiyata e seraaji gure : bootaaji (mbuusuuji) daneeji ina mbeɗoo, iɗi mbaɗi henndu uurndu, kono so miin ñaamii ɗi, min ñawat. Ɗi mbarii ko heewi e amen. Ko mbaylaandi « isinaaji » ndi wage men o adii haalde haala mum ndi. Ɗii bootaaji ko tanaa wonande en ».
Fowru jokki yeewtere nde, wiyi : » A haalii goonga, ngati minen, Demmba Dañɗo en, beyi, e nayi ɗi min conngata ɗi, maa ɗi min tawata ina maayi ɗi, so min ceekii kuuseeji mum en, miɗen tawa heen bootaaji ɗi Buubu mayndu wiyi ɗii ; ɗum ne iɗi kaaɗi. Teew ngu ina waylii, jiidaa e teewu ngu ɗi ngalaa e mum ngu, ko nguugaa ɓuri dakmude. »
Mbaroodi heɓɓitii yeewtere nde, wiyi : « Miɗa teeŋtina ko Buubu-ɓayndu e Demmba-Njarel-Fowru kaali ko ». Fawti heen wiyi : « Teewu nagge walla mbeewa, maa mbaalu ngu bootaaji ɗi tawaa e kuuse mum kala safataa, welataa, jiidataa e ɗo ɗi tawaaka ɗo ; ɗuum ko huunde woodnde sanne ! Botaaji ɗi cellaani, ɗi moƴƴaani. Yo ɗi ngitte e ladde nde haa ɗi laaɓa wata ɗi mbonnude jawdi ndi, e ko wuuri e jawdi, hono minen en e yimɓe e koye mum en, tanaaji ɗii bootaaji mbarii ko heewi e jawdi e bayɗi. Yo ɗi pewjane ko yaawi, yo ɗum sakkane peeje tiiɗɗe, kisnooje e tanaaji majji gila law ».
Mbabba ngirja jokki kañum ne yeewtere nde, wiyi : » ko nii ndeke, sabu minen girji, so miɗen pugga e nder beeli, miɗen njiiloo taɓɓe maa ɗaɗi naare, e semmbaan, e gowe, miɗen kawra e bootaaji ɗi cifi-ɗon ɗi, iɗi kaaɗi, kala ɗo ɗi ngoni : taɓɓe mum, e ɗaɗi mum, ko naati heen e deedi amen kala wontanta min ko rafi, maa ndogu reedu walla muusu reedu. Ko ɗi huunde bonnde no feewi. Miɗa anndi ko waameeji ngaddata ɗi e nder beeli, e caalli amen ɗi. ;i kaanaani woppeede ɗi caroo e ladde. Yo ɗi ngon ñaamde jeynge, wonaa ñaande men. » Miin e hoyre am, ɗuum ina hulɓini mi no feewi, no wage men o huliri ɗum nii. »
Yeendu : « Ɗum ina foti ƴeeweede no feewi, daranee mbele ina yiytanee peeje daɗndooje en e tanaaji ɗi baylirɗe ɗe ngukkata (njuppata) e sato men ngo ».
Dollundu hocci konngol wiyi : « Banndiraaɓe adiiɓe mi haalde ɓee kala, ko yaɓɓuɓe mi e ɗemngal, ma a taw alaa ko heddii tan so wonaa mi teeŋtina ko ɓe kaali ko ; sabu teeŋtinde ko haalaa ko rokkude hujja o semmbe haa o waawa yoolteede. E fawaade e ɗuum, mi wiya gustagol puɗi ngol, e ɓeydagol kenuuli besooji njaareendi iwrudu fuɗnaange rewo feewde hirnaange worgo, ko huunde wonnde tan e ɓeydaade, e no ɓuri soklinde kala guurɗo e puɗi, walla guurɗo e ko wuuri e puɗi, ko wayi no amen, minen dolluɗi. Miin ko mi joom duuɓi, min mbaɗii fergooji keewɗi, tawa woni sabaabu majji ko gubbagol doldolɗe amen : ngati ɗo min koɗi jooni ɗo, ko e tampere gaastagol duumingol min ngondi. Ɗoon ne ko min jogorɓe ferde ɗum batte ɓeydagol nduufndaldi, e bone goɗɗo ɓeydaade heen, hono bootaaji poore biyaaɗi ɗi : ɗi mbaɗtii tawde min haa nder gasɗe amen doldolɗe. Wiyaama : « henndu ina waawi naatnude e ngaska ko waawaa yaltinde. » Ko jaltingol ɗiin bootaaji jooni wontani min tanaaji goɗɗi, tawti ɗiya. » Yo ngal ɗoo dental sakku pewje no ɗii tanaaji ñawndiraa, « gila konu yettaaki ñaande ». Sabu laddeeji fof keewii bootaaji ɗi, ɓaawo nde gure keewi. » On paamii ko njiiɗ mi wiyde » Ko ɗo yeewtere nde faɓɓi ngolɗoo laawol.
