Ñalnde aset 17 mars 2007, kolonel Ely wul Muhammed Faal hurmbitii to Suwoyraat, eɓɓaande faggugu nde hono mum «heewde faayiida meeɗaa to bannge ngalu e to bannge ngartam to bannge faggudu meeɗaa ummineede e leydi ndi». Eɓɓaande nde wiyetee ko «El Ouj» (El Uj), nde yowitii ko e jeñtingol e njeeygu miliyoŋaaji jeeɗiɗi hitaande kala, sifaa njamnndi keewndi nafoore wonande liggogol jamɗe. E rewrude e SNIM, Muritani jogori gollondirde e ndeeɗoo eɓɓaande ko e sosiyatee gooto Ostaraalinaajo (Sphere), sosiyetee Sawuudnaajo (Sabic), e sosiyatee Kattaarnaajo (Qatar Steel). Ina wiyee wonde ndeeɗoo eɓɓaande ma addan Muritani waawde naftoraade fannu njamndi keewndi no feewi e diiwaan Tiris o, njamndi ndi alɗaano no feewi. Ma ɗum ɓeydu faayiida gollal ngal tee maa addan julankooɓe mbaylaandi heewɓe reerɗude arde gollondirde e Muritani.
Ko ina ɓura miliyaar e feccere dolaar maa waɗe e ɗee golle, tee battina no moƴƴi e ƴellitaare rewo leydi ndi. Ma ɗum natnan leydi ndi hitaande kala, fotde feccere miliyaar dolaar, e nder duuɓi capanɗe tati. E ooɗoo sahaa jamɗe Muritani ina yentina fotde 11 miliyoŋ ton njamndi hitaande kala, jeyeteeɗe e ko ɓuri teeŋtude leyɗe Orop e leydi Siin.
Muritani yahrii yeeso e hitaande 2006 nde. Muritani woni hikka hoore leyɗe 10 Afrik ɓurɗe yahrude yeeso to bannge faggudu e hitaande 2006 nde. Ɗum ko fawaade e ɓetirɗe Goomu Faggudu Fedde Ngenndiije Dentuɗe wonande Afrik (CEA). Fannuuji faggo ɓurɗi ƴellitaade e hitaande 2006 e Muritni ko ɗiiɗoo : kaalis o (ugiyya), nokkuuji diƴƴe isaas (hydrocarbures), oogirɗe, banngagol (tourisme) kam e awo. Rewi e Muritani ko : Anngolaa, Mosammbik, Sudaan, Ecopi, Libi, Konngo Demokaraatik, Konngo Baraasawil kam e Malawi.
Abuu Kan
