Jeewtuɗo o, hono ganndo mawɗo, Sammba Sangalde heɓɓitii yeewtere nde wiyi : « Annduɓe mawɓe, on njettaama e innde denndaangal puɗi e sato, e kala ko wuuri e duunde men nde, sabu on kaalii fof e banngeeji ɗii kala, on njaaraama sanne. Jooni, mi rutta yeewtere nde e juuɗe ɓage men mawɗo o, ƴeendu, o tonngaama en loowdi keewndi nafoore wonande en, e wonande yontaaji payɗi arde, peeñndi e yeewtere nde ganndo haala e ma ». ƴeendu ɓage mawɗo o, heɓɓitii haala, wiyi : » ɓon e mon biynooɗo ko joofii wonde maa yeewtere nde waɗ nafoore no feewi. Ko o millunoo ko waɗii tigi tigi e haa ko ɓuri alaa ! ƴeewtere nde, faayiida mayre e kuuɓal feeñi ko e anndude yeewtuɓe ɓe lowre nde, e fenñinde ko soklanoo yoo feeñ ko, keɗiiɗo nana, heɗna ɗum mo nanaano ; ɗum saroo, yettoo noppi keewɗi, waasataa heen malaaɗi, kuutoroo ko nani heen ko. ƴeewtere nde yaltinii caɗeele puɗi, e sato ngo e kuuɓal, e ko woni sababuuji caɗeele ɗe. Coppe, e tuundiiji baylirɗe, e ndeereeru aadee en ngonngu caggal ɗuum.
Ɗeeɗo geɗe kala njibinanii en ngoƴaaji mawɗi, e kulhuli keewɗi wonande ngonka men hannde, e ko fay e arde. Jooni, heddaaki, so wonaa yoo caɗeele teskaaɗe ɗe cakkane pewje no ɗe ñawndiraa gila law ; sabu tanaaji majje ko peeeñɗi no feewi. Sato ngo fof ina fuɗɗii tinnde rafi o e kuuɓal, ko maa ɓurondira tan! Ko feewti e ɗuum, won e mon biynooɗo yoo pewje cakke ngam haɓaade tanaaji biyaaɗiɗi, gila konu yettaaki ñaande. Hannde o, eɗen poti teeŋtinde wonde so konu yettaaki ñaande nde ne, faandiima ɗum. ɓon e mon kadi biiynooɗo so bone tintaama fuuyii, kono woni fuuyde ko fuuynude ko fuuyaani ». O ɓamti hoyre ! ɓage, jiyoowo ko arata, tawa heewɓe njiyaani ɗum ! ƴeendu ñiiɓni gite mum e gite kala tawtoranooɗo yeewtere nde, ñippi gite, deƴƴi ! ƴeewtere rowi ɗo.
Suleymaani Kan, ñande 10/12/2004
