Muritani e Espaañ ciifondirii nanondiral jowitiingal e yah-ngartaa gollotooɓe Muritaninaaɓe feewde Espaañ. Ɗum waɗnoo ko ñalnde 26 sulyee 2007 tawi Jaagorɗo Espaañ ko fayti e gollingol, hono Jesus Kaldera ina ari Nuwaasoot. E nder nanondiral he, Espaañ dottanaani Muritani yimɓe ɓe ƴettanta ɗum, kono Muritaninaaɓe njeyaa ko e idotooɓe ƴetteede e fawaade e soklaaji gollotooɓe jogii. Leyɗe ɗiɗi ɗe maa cos njuɓɓudi potndi pottitaade yuɓɓinde naatgol gollotooɓe Muritaninaaɓe, dewngol laawol, e nder leydi Espaañ. Espaañ ina gaddanii denndaangal gollotooɓe Muritaninaaɓe rewruɓe ngol ɗoo laawol dagingol denndaangal hakkeeji ɗi gollotooɓe Espaañnaaɓe keɓata e leydi mum en. Kala gollotooɗo jiɗɗo yahde toon maa daña kontraa (Contrat) keblaaɗo, siifaa tawo ɗo e Muritani. Muritani kañum ne huniima sosde ɗo e leydi he nokkuuji keblirɗi gollotooɓe mbele so njahii toon ina moƴƴina golle mum en.
Hannde ko ina tolnoo e 5 000 Muritaninaajo ina ngolloo to Espaañ, tawa ko e laawol, tee ɓe meeɗaa teskoreede toon bonannde. Nuwaasoot e Madriid maa ciifondir e ko fayi « nanondiral cehilaagal, koɗdiigu moƴƴu e gollondiral » tawa kala ko ina waɗee hakkunde leyɗe ɗe ko heen tuugotoo. Ko ina wona duuɓi keewɗi jooni, Afriknaaɓe heewɓe ina etoo naatde Espaañ e rewrude e laabi boomaare bonɗi ko wayi taccugol geec e laakon tokoson.
E hitaande nde ngon-ɗen ndee tan ko ina tolnoo e 4 700 neɗɗo njaggaama ina telloo e laaɗe. Kamɓe fof ɓe mbaɗaa ko e nokkuuji deenirɗi, tee yoga e maɓɓe ko jogorɓe nawteede cuuɗi mum en. E hitaande 2006, ɓe njettiima e 31 000 neɗɗo naatɓe Espaañ tawi ndewaani laawol. Ko yoolotoo heen e nder geec anndaaka no foti.
Tesko : Ɗum noon kala banndiraaɓe jogiiɓe mecce, yiɗɓe golloyaade Espaañ yo mbaɗ feere kumpitoo, mbele Alla ina newnana ɗum en golloyaade toon.
