Ñalnde alet 29 suliyee 2007 ñalawmo pinal paayodinɗo yuɓɓinaama to Seyyeen Gababe sara Kayhayɗe. ƴuɓɓini mo ko sukaaɓe Seyyeenaaɓe e ballondiral mawɓe wuro Seyyeen, tawi kaɓirɗe juɓɓiniraaɗe ɗe, ko fedde nde wonaa laamuyankoore wiyeteende FLM e gardogol Huley Mboh walliti ɗuum. Ñalnde alet 29 suliyee 2007, hade ñalngu ngu udditeede ko yarngo (njuulu ngam ñaagaade toɓo) adoraa, nde wonnoo tawi leydi ndi kala kono dawri ñaagaade toɓo e noddaandu mawɗo leydi o.
E baawɗe Alla, hade naange e hoore tawi ƴiiwoonde feŋii bannge fuɗnaange, nde toɓi haa waame dogi. Ɗuum leeltini udditgol ngol, nde tawnoo ko hedde waktu sappo e goowaɓo jogornoo fuɗɗaade. Nde ƴiiwoonde nde siilti, waktu tataɓo kikiiɗe golle ɗe puɗɗii : ɗe udditiraa aaye quraan e daande Muhammadu Sal, caggal ɗuum ko konngol bismaango e daande Kajjata Idi Njiim, e pulaar laaɓɗo cer o bismii arɓe tawtoreede ɓe, o holliri weltaare maɓɓe e nguu ɗoo ñalngu, wondude kadi e darnde Seyyeenaaɓe ndarii ngam ƴellitde pine ganni haa teeŋti e pinal fulɓe e nder leydi Moritani. Konngol bismaango ngo firaama e Arab e Farayse e Engele.
Caggal ɗuum mawɗo wuro ngo hono Hammadi Buuɗi Bah ɓamii konngol ngam wasiyaade yimɓe ɓe e daranaade golle ɓamtaare, meer komin Ganki ɓamii kam ne konngol ngam yettude yimɓe ɓe e no ndarorii e ngal ɗoo boowal toɓo ina juurta e maɓɓe, meer Ganki, hono Abuu Sammba Gannge, hollitii maa komin o mahan Seyyeen nokku ɗo ɓe mbaawata rentude tawa hay so toɓii ndiyam yanataa e maɓɓe. ƴimɓe woɗɓe ɓamii toon konngi kaali haala paayodinka na feewi. Sukaaɓe Seyyeenaaɓe mbaɗii pulareeje juɓɓuɗe, jime belɗe e tinndinooje keewɗe. Ina jeyaa e ɗeen tinndinoore faytunde e SIDAA.
Mbiyen tan ñalngu ngu yahrii na haanirta nih, faayodinii, Seyyeenaaɓe ngolliima na feewi, yantude heen kadi ɗuum hawriti ko e uddugol duɗal maɓɓe ngal FLM rewintoo. Mammadu Bah lollirɗo Dooro mo Likseyba Gorgol ina jeyaa e jirwinɓe ñalngu ngu nde wonnoo ko kanko falindinoo gaaci ɗi. E nguu ɗoo ñalngu pinal FLM nuldiino toon haralleeɓe ngam ƴettude nate e filmude, ko ɗuum waɗi ñalngu ngu no yahrunoo fof filmaama, nate ƴettaama kala cokluɗo heɓde no golle ɗe njahrunoo nih tawo ko e fimo walla nate »fotooje » ina waawi jokkondirde e Aliw Bah to Kayhayɗi e ndeeɗoo tonngoonde telefon: 645 78 41.
Hade en uddude eɗen kollita wonde ñalnde 01-08-2007 duɗal Siiwi uddii caggal nde ngal teddiniri FLM hiirde pinal. Arannoo FLM ko Bintu Gey, ɗoon eɗen mbiya tan geɗe ɗee kawrii, tee jannginooɓe gure jeegom ɗe fof kawritii heen.
Muusaa Jibi Taal, kebloowo e ɗemngal pulaar Telefoŋ 673 10 68. E-mail: moussatall2003@yahoo.fr
