Hooreejo leydi Muritani Muritani, hono Siidi ɓul Seek Abdallaahi, yilliima leydi Farayse tuggi 27 haa 29 oktoobar. E nguun njillu o yeewtidii e gardiiɗo leydi Farayse, hono Nikolaa Sarkosi (Nicolas Sarkoɗy). Ina ɗaminaa maa ɗum teeŋtin gollondiral hakkunde leyɗe ɗiɗi ɗe. Ammaa ɗum o yeewtidii e gardiiɗo fedde Farankofoni (Francophonie) hono Abdu Juuf. Siidi yettii mo sabu ballal fedde nde e taƴtugol daawal ɓennungal ngal, ɗaɓɓirii mo ballal to bannge jaŋde Farayse e leydi ndi, haa arti noon to Iniwersitee to. Siidi heɓii kadi yeewtidde toon e pelle daraniiɗe jojjanɗe aadee gonɗe to Farayse, haa arti noon e ardiiɓe fedde wiyeteende CAMME (renndinnde militeeruuji mooliiɗi). Ɓe njeewtidii ko fayti e gartugol taccinaaɓe e ñawndugol bonanndeeji.
Kamɓe mooliiɓe ɓe, ɓe njettii no feewi hooreejo leydi ndi sabu heɓaare mum. Caggal ɗum Siidi tawtoraama joɗnde 34ɓere Fedde Ngenndiije Dentuɗe toppitiinde pinal e nehdi e siyaas hono UNESCO. O waɗii toon diskuur mawɗo. E nder haala makko o teeŋtinii nafoore jaŋde sibu ko «kam tan waawi gaddaade mahgol renndo nuunɗal». O yettii UNESCO sabu ballal mum e jaŋde e nehdi, darnde mum ngam mumtugol humambinnaagal yantude e ndeenka gure e nokkuuji ganni haa arti noon e Shingiti, ɓaadaan, ɓaalata, Tiisiit, Banndargin (Banc d’Arguin).
