Musiiba caɗeele ndema nana weeya he Saahal e Muritani. Lilluɗe keewɗe baɓatti ine kulanaa bonnude coñal e duraano jawdi. FAO teeŋtinii he lewru oktoobar nduu wonde ngonka kaa ine faayni no feewi.
FAO teeŋtinii, he lewru kawle nduu, wonde ngonka Muritani kaa ine faayni, sibu lilluɗe baɓatti kecci e mawɗi njiyaama e diiwe keewɗe.
Baɓatti ɗii ine njokki e jibinde : fotde 4 379 hektaar (ha) toppitaama e lewru silto (settaamburu) ɓennundu nduu, e 601 ha tan e lewru juko nduu. FAO ine jokki e jeertinde wonde baɓatti ɗii ine mbaawi toccinde laawol goɗngol e daawal paangal ngal. Ine hulaa hoto ɗum jibinde lilluɗe keewɗe goɗɗe.
Wonande remooɓe e aynaaɓe, bonannde ndee ine waawi fantude : baɓatti ñaamat ndemri e duraano, alaa ko keddata. Ɗuum noon ko huunde leefnoore kattanɗe nguura yimɓe hoɗɓe dowri ɓee. Oo bone ketɗo ine naamndii dendinngol doole, yimɓe wonɓe he nokkuuji kumpitee gila e law, haa teeŋti noon rewrude e ɗemɗe ɗe paamata ɗee, gooto he ɗemngal nokku mum.
Yimɓe fof ine poti tafde loowdi jeertinirdi he ɗemɗe mum en ngam hirjinde remooɓe e aynaaɓe he baɗte oo musiiba, e peeje paddorɗe e kaɓtorɗe.
Bookara Aamadu Bah
