Catal FƁP Nuwaadibu yuɓɓinii hiirde pinal mawnde ɗo e Nuwaadibu ñalnde 5 lewru suwee saanga waktu 5ɓo kikiiɗe haa waktu 11ɓo jamma to sinema Jamjam (cinéma Zemzem) ngam mawninde hitaande 32ɓiire FƁPM.
Adii fof ko konngol udditirgol hiirde nde ngol hooreejo fedde nde waɗi hono Kan Aamadu Saydu ngam bismaade banndiraaɓe arɓe tawtoreede hiirde nde e ndenndaangal pelle pine e pelle gure nootitiiɗe e kewu o. Caggal ɗum o hollitii weltaare makko e yiyde ɓiɗɓe fulɓe ina ndeenti e nokku gooto ngam ƴellitde pinal e ɗemngal mum en. O hollitii payndaale fedde nde, o siftinii kadi banndiraaɓe ɓe ko hikka waɗi duuɓi 32 ko fedde nde ina darii gollaade ngam haɓaaɗe humambinnaagu e majjere e ƴellitde pinal e ɗemngal men. O siftinii yimɓe hitaande nde fedde nde cosaa (ñalnde 4 suwee 1976). E konngol makko sakkitol, o teeŋtinii yo yimɓe njanngu pulaar sibu ko ɗum woni ko nawrata en yeeso.
Eɗen njetta Kan Aamadu Saydu e darnde nde darii sabu duuɓi ɗi o jogii hannde ɗii, ina tiiɗi nootittooɓe hono ɗii kiirɗeeli (paytuɗi e pinal maa ko nanndi heen. O meeɗaa yahtirde heen caggal ; kala nde o noddaa, o mo heɓii. ɗum ko tiɗnaare mawnde no feewi sanne. Eɗen nduwanoo mo nde ɗum yahrata yeeso Aamiin.
Caggal ɗum geɗe hiirde nde ko hono nii lelorii : Ko idii fof ko goomu pinal catal ngal yuɓɓini jimol udditigol hiirde nde ngol tiitoonde jaaroore FƁPM. Caggal ɗum Fedde ƴellitaare addii ballal mum haa timmi : njalniika paytuka e lammbaaji men hanki no siforinoo. Refti heen ko Fedde Mbaañ yuɓɓinii jimol ngol tiitoonde «ɓiɗɓe Fuuta». Nde ɗum joofi ko Fedde pinal Looti mo Baabaaɓe waɗi heen jimol ngol tiitoonde « Ɓamtaare Pulaar ». Rewi heen ko Fedde Kahayɗi yuɓɓinii heen jimol jahdungol e ngamri, jimol ngol fayti ko e leydi Moritani. Refti heen ko «Nafoore jaŋde» ko tiitoonde jimol ngol Sukaaɓe Fedde Bilbasi njuɓɓini ngam semmbinde yimɓe yoo janngu.
Caggal ɗum ko njalniika ko tufam ɓerɗe tawtoraaɓe hiirde sabu ko jaleeɗe e kelle ngam hollitde weltaare e ngootaagu : ɗum ko ballal fedde Jaayre pelle. Ka ɓuri joofaade ko gorko Baawaaɗo. Nde ɗum yawti ko Fedde Foonde yuɓɓini jimol ngol tiitoonde « ɓiɗɗo debbo mo wuurdaaka yumma mum ».
Rewi heen Fedde ‘Muñaa’ (ko Fedde Sukaaɓe sarakulleeɓe) yuɓɓini heen njalniika paytuka e ɓiɗɓe fulɓe yoo kaalat ɗemngal Sooninke. Fedde Halayɓe waɗii heen yimre ngenndiyanke. Fedde Dental yuɓɓinii tinndinoore ko fayti e nafoore jaŋde pulaar. Hiirde nde uddiraa ko jimɗi sukaaɓe naalankooɓe wuro ngo hono Aamadu Bah e Jibi Jeŋ e Abdullaay Baal.
Caggal ɗum ko mussiɗo Jibiriiru Aamel Sih ɗowatnooɗo hiirde nde yetti denndaangal banndiraaɓe arnooɓe tawtoreede hiirde nde, o duwii nde ɗum yahrata yeeso, o ñaagii Geno toowɗo o nde yimɓe kawrata heen mo wuuri.
Abuu Kan Nuwaadibu
