Ñalnde 12 abriil 1961 Yuuri Gagariin ɗannanii weeyo, woni aadee gadano baɗɗo ngaal ɗanngal. E oon sahaa, pooɗondiral e daɗndu ina tiisi hakkunde Dental Leyɗe Sowiyet e Amerik, tee ko yahde nder weeyo wonnoo himme maɓɓe ɓurɗo teeŋtude. Hannde, nde tawnoo ngonka kaa wayliima, eɗen ngoɗɗi nduun daɗndu, haa teeŋti noon sabu caɗeele ngalu. Ko wonnoo Dental Leyɗe Sowiyet fusii gila e hitaande 1980, leydi Riisi ndontundi ɗum ndii ina wondi e caɗeele mawɗe to bannge ngalu.
Kono ɗum haɗataa aɓe njogii eɓɓaaɗe goɗɗe mawɗe, ko wayi no yahde ƴeewoyde ko woni e tagofeere Mars (hoodere Jaayre). A ɓe eɓɓi neldude fisee Soyuus keso ngam sunnoyaade niɓɓe kammu. Aduna oo fof noon ina anndi, hay so tawii Riisi ina daña caɗeele won e sahaaji, taaɓal payngal ngal, winndere ndee foti waɗde ko yahde to tagofeere Mars. Toon noon, alaa leydi mbaawndi yahde toon kam tan ngootiri, alaa e sago winndere ndee kala wallondira, gila e Sapon, Amerik, Siin, Riisi, Orop …
Ina wiyee noon, yahdu Mars nduu fof e saɗtude, ko gartol ngol ɓuri mettude yuɓɓinde, sabu fooɗo tagofeere ndee. Ɗum noon ina gasa yimɓe idoroo tawo yahde to wooturu e lebbi Mars wiyeteendu Fobos, sibu ɗuum ɓurata newaade, caggal ɗum noon njaaɓana Mars, tawa ina ŋabbira Fobos. Kono ngal ɗoo ɗanngal wonaa jooni, sibu peewnugol laana mbaawka rimndude denndaangal kaɓirɗe cokloyteeɗe toon ɗee, kam e yimɓe ɓee, ina ɗaɓɓi daawal moƴƴal, ko famɗi fof duuɓi tati.
——————————
Facciro :
Fobos ko “ lеwru ” Mars ɓurndu mawnude ; nduya lewru, ɓurndu famɗude nduu wiyetee ko Deymos. Inɗe lebbi ɗiɗi ummii ko e ɗemngal Gerek : Fobos firti ko “ kulol ” ; Deymos ne firti ko “ kulol ɓurtungol ”.
Yuri Gagarin, (Юрий Алексеевич Гагарин) jibinaa ko ñalnde 9 mars 1934. O sankii ko ñalnde 27 mars 1968. Kanko woni aadee gidiiɗo ɗannaade e nder weeyo. Ngaal ɗanngal anndiraa ko “Ɗanngal Wostok” (12 abriil 1961). O sankorii ko duuɓi 34 fat, nde ndiwoowa ka o konndirtunoo (Mig 15) yani e leydi.
——————————-
