Haa hannde ɗum toɗɗii ko ɗemɗe e masinaaji. Haa e ñalawma hannde oo, so neɗɗo yiɗii winndude huunde maa winndira junngo mum walla tappa e masin, nde winndannde mum feeña. Ngol ɗoo laawol kadi taaɓal badangal ngal, ko Google waɗi ɗum. Taaɓal badangal ngal ko masiŋaaji na “mbaɗta faamde haala, mbinnda ko paami koo ». Ɗum woni ko anndiraa “karallaagal keɓtingol daaɗe», walla mbiyen kadi “karallaagal keɓtingol sawta”.
Winndannde bayyinnde ɗum ndee ko nii fuɗɗorii :
So tawii oɗon njogii telefoŋ Android (mo Google yeeyata oo), mbaɗiree nii : so ekraa jaɓɓorɗo oo feeñii, ɓoɗɗee e natel mikroo ngel, caggal ɗum mbiyon “ no foti Angströms woni he miles? ”. Haaldu no ngoowno-ɗaa haaldirde, tawa a leeltikinaaki walla a ƴagginaani haala maa, “ angström ”. So tawii seŋorde maa internet ina moƴƴi, ina yaawi kadi, wonataa leƴƴannde, telefoŋ maa ina foti faamde naamnal maa, winnda jaabtawol ngol ɗoo : 1609 344 X 1013. ”
Ɗum ɗoo ina yaha marsa wonande naamnde kala. Yeru, naamndo-ɗee “No foti 10 laabi 10 so feccaama e miliyaa- rùuji 5 wonata » ? Telefon maa waɗat hiisa oo. Hay sinno naamndi-ɗaa mo ko laawol pot-ɗaa rewde fayde won oon nokku (wonande gure leyɗe mawɗe ekn. e ooɗoo sahaa) walla a rokkii mo adrees nokku … maa telefoŋ maa nat kartal, diida heen bolol potɗaa rewde, e hol no potataa yahrude toon !!!
Huunde ndee ina marsa e ɗemɗe goɗɗe ko wonaa Engele tan. Topirde Android firoore ndee (e nde woodi kadi e iphone) waɗtat Engele ɗee he Farayse kaaleteeɗo (ina waawi wonde ɗemɗe goɗɗe). Telefoŋ oo kadi ina waɗi “ cuɓal уeewtere ” gaddanoowal, e yeru, kaaloowo Engele kuccitɗo e carwo (masin carwoowo) to Farayse waawde nantinaneede e Engele ko haaletee e Farayse. Tengiti ngal dow kadi, aɗa waawi fidde (fido) Android iimeeluuji maa e binndanɗe maa, o winndan maa ɗum haa laaɓta.
Kala enndunooɗo topirde “ keɓtingol daande” ina waawi waasde softande hoolkisaade ko haalaa koo. Sibu ndeen, maa neɗɗo haalda no masiŋ haaldata nii, tee juume binndol ina keewi no feewi, haa ko ngañtaa, pellitaa tappande hoore maa winndannde maa. Kono hannde, topirɗe keɓtinooje daaɗe njahrii yeeso no feewi : hannde, kaaldataa tan ko no kaalirtuno-ɗaa, masiŋ oo winnditano maa. Topirde Google ndee noon huutortoo ko denndaangal gannde mooftaaɗe e nder Google, carwooji doolnuɗi njuurnitoo haala maa ngam faamde ɗum. Ina yaawi no feewi, tee ɗo ngon-ɗaa kala aɗa waawi ɗum huutoraade, tee eɗum yuumti sanne. Kaaldataa tan ko no ngoowruno-ɗaa (so aɗa yiɗi waɗde heen poofirde noon, maa mbiyaa mo ‘piccal’ walla ‘toɓɓere’, nde o waɗa heen pісcal walla toɓɓere)… Hol ko addani gollirgel ‘keptingol daaɗe Android yuumtirde nii’ ? Kо sabu keewal keɓe mooftaade he Google. Topirɗe keptingol daaɗe jeyaa ko e porogaramuuji (topirde) “ yoyre tafaande Google (ɗeya ko kuutorɗe firo walla njiylawu nate) juumtuɗe sanne.
Wonande keɓtingol daaɗe ngol noon, ko daaɗe keewɗe ƴettaa, mooftaa e carwooji Google. So tawii a meeɗiino haalirde gootal e kuutorɗe Google, ina gasa tawa daande maa, sawtawol maa ina maraa (mooftaa) e carwooji Google. Ko sabu Google mooftude daande maa, e daaɗe goɗɗe, addani topirde mum waawde heɓtinde daande am e faamde ko kaalat-mi koo…
E rabbidinaade, ndeen, so neɗɗo yiɗii naatnude huunde e potaabal mum walla ordinateer mum, maa tappira junngo mum. Ko haalaa ɗoo koo, firti ko aɗa waawi huccitde e portaabal maa, kaalaa, o winnda ko kaal-ɗaa koo.
Bookara Aamadu Bah (Yoogirde : Slate.fr)
Tesko : Ko sabu kimmugol ndee ɗoo winndannde addani en etaade firde ɗum. Ina gasa noon wooda heen geɗe “ mettude faamde ” nde tawnoo ko geɗe joopiiɗe karallaagal ɓurngal seeɓde. Kono tan hay sinno ko e Farayse, ko noon faamamuya mum saɗtirta, alaa e sago taroowo oo, yiyloo firo won ɗeen kelme kuutoraaɗe…Ko ɗum waɗi en nii fentude kelme kese e nder firo hee, nde tawnoo ko kelme ɗe cuwaa tawo saraade hay e nder ɗemɗe mawɗe ɗee (yeru hitaande porseseer). Ina jeyaa e ko addani en reerɗude firde geɗe bayɗe nii, yiɗde hollude nafoore wonde e naatnude geɗe men, haa arti noon e ɗemɗe men, gila e binndol haa e haala, e nder Google (walla e Yahoo…??), sabu men yenaneede maa ɗum addan ɗemɗe men (e geɗe men goɗɗe…) saraade ko yaawi : ko sodorde. Ko yiɗde wiy ɗe tan, hannde, alaa fof ko ɓuri internet e won ɗee gollorɗe bayɗe no Google himmande ɗemɗe men. Ko fartaŋŋe “ janɗo” e men mo en potaani welsindaaɗe so en njiɗaa heedde laaci ɗoo e duuɓi garooji. So en mbaɗii ɗeen golle, ina gasa ɗemɗe men ƴellitoo ko yaawi, so en mbelsindiima, en mbaɗaani ɗeen golle, ina gasa ɗemɗe men maaya, majja menndeŋ, sibu, weleede e metteede, nguurndam aadee en ko e karallaagal kesal jogori tuugaade e “ janngo bаdiiɗo ɗoo ” garoowo oo.
Kelmeendi
– Porseseer : processeur
– Ruulde porseseeruuji : muage de processeurs
– Hitaande porseseer : ko porseseer gollotoo e nder hitaande. 70 hitaande porseseer : gollal porseseere nder duuɓi 70, walla golle 70 porseseer e nder hitaande wootere.
– Cuɓal yeewtere : mode discussion
– ƴoƴre tafaande : intelligence artificielle
– yiylorde : moteur ɗe recherche
Bookara Aamadu Bah
