E hitaande 2012 mbayliigaaji mawɗi ina tijjaa sibu, woote gardagol leydi maa njuɓɓine e nder leyɗe noogaas (20), tawi kadi won heen ko leyɗe mawɗe, ko wayi no Dental Amerik, Riisi, Inndo, Farayse, Meksik walla kadi Espaan. Yanti heen leydi Siin maa toɗɗo hooreejo leydi keso. Siin wonaa woote yuɓɓinta, kono ko ardiiɓe parti laamiiɗo leydi ndii suɓotoo hooreejo leydi goɗɗo. Gaa ɗum ɗoo, ina gasa kadi mbayliigaaji laamu goɗɗi ɗi ngaadoraaka mbaɗa, hono no ceedori-ɗen ɗum hikka nii haa arti noon e nder leyɗe Aarabeeɓe. Hay so tawii darngo darotaako e 2012 (no won heen cikkirta nii), ina yaakoraa kam maa aduna oo waylo no feewi, haa teeŋti noon to bannge politik. So a ƴeewii, aɗa waawi wiyde leyɗe noogaas e nder 200 leydi (limoore leyɗe winndere ndee) ko seeɗa, kono so a ƴeewtindiima ma a taw leyɗe noogaas ɗee ko leyɗe maantinɗe no feewi, to bannge keeweendi yimɓe (Inndo, Meksis, Riisi), to bannge doolnugol faggudu mum en (Siin, Amerik, leyɗe mawɗe e nder Orop, bayɗe no Farayse, Espaan, walla leyɗe Afrik ɗe pamɗaani, ko wayi no Senegaal, Gabon e Keñaa).
Huunde e limooje
✓To bannge keewal, ina gasa mbayliigu nguu toɗɗoo fotde miliyaaruuji tati e feccere (3,4 miliyaar) neɗɗo, woni feccere e winndere ndee (e limoore Fedde Ngenndiije Dentuɗe, winndere ndee ina waɗnoo 6,8 miliyaar neɗɗo e hitaande 2009).
✓To bannge faggudu ko hono kadi ko noon, ɗee ɗoo leyɗe njogii feccere faggudu winndere ndee. Kono to bannge politik kadi ɗe ɓurii ɗoon, sibu heen leyɗe nay njeyaa ko e terɗe joy ɗuumiiɗe e Goomu Kisal Fedde Ngenndiije (Siin, Amerik, Riisi, Farayse), ko Angalteer tan nakki. Heen leyɗe joy kadi njeyaa ko e leyɗe jeenay jogiiɗe bommb atomik (leyɗe nay dow ɗee yantude e Inndo). Ɗum noon, ina gasa tigi yeeso winndere ndee wayloo no feewi e hitaande faynde ndee, kono, mbaɗen leydi e leydi. Oboma e Sarkoosi ina mbaawi waasde todditeede so en tuugiima e daraja maɓɓe e nder leyɗe mabɓе hee. Mbayliigu to Amerik, leydi maamaari to bannge politik e faggudu e pinal e konu … noon nawdetaake e mbayliigu nder Farayse.
✔To Siin, Batu mooɓondiral 18ɓu Parti Koministe maa naatnu mbayliigaaji mawɗi e ngadiigu leydi ndii : Hu Jintao, hooreejo leydi hannde oo, maa lomtine ; ko noon kadi wonande Hooreejo hilifaaɓe hono Wen Jiabaо kam e Hooreejo ‘Mooɓondiral ngenndi’ hono Bangguo. Terɗe 7 e nder 9 jeyaaɗe e “ Tumbudu duumiindu yiilirde politik tumbudu rowrowru parti oo ” (comité permanent du bureau politique du comité central du parti), hono njuɓɓudi ɓurndi toowɗe e leydi ndii, ko lomtinteede ; ko noon kađi wonande sappo e nay (14) tergal e nder terɗe 25 jeyaaɗe e oon biro politik. Nii woni hoohooɓe politik e miijo е njuɓɓudi e faggudu e konu, ɓurɓe toowɗe e leydi ndii ko lomtinteeɓe e hitaande 2012.
✓To Riisi ina ɗaminaa ko kanndidaa parti gardiiɗo jogori hoonaade e woote gardagol leydi ɗee. Heddii ko anndude holi oon ? Mbele ko Dimitiri Medwedew walla ko Waladmiir Putin. Putin ina yiɗi wonde hooreejo leydi, kono Medwedew seeraani e hollitde wonde suwaa tawa yahde.
✓ To Inndo, laamu ɓuri wonde ko е juuɗe parlemaa (Suudu Sariyaaji), ɗum noon ko hooreejo hilifaaɓe woni toon gardiiɗo leydi. Nduun suudu noon wayletee ko e 2014. Ɗum noon, so en tuugiima e ko woote garooje e hitaande 2012 ɗee mbaawi jibinde, ina gasa yeeso winndere ndee wayloo. Kono kadi eɗen nganndi baylagol hooreejo leydi firtaani mbayliigu politik ndiin leydi. Hitaande 2011 noon hollitii en gila e jooni wonde mbayliigaaji ɓurɗi teskinde ɗii ina gasa mbaasa rewrude e woote.
Bookara Aamadu Bah
