Siidi El Muttaar wul Naaji, meeɗnooɗo ardaade Banke Santaraal Muritani (BCM) ina yooɓtoraa majjere 24 miliyaar ugiyya saanga nde ardiibanke o hakkunde hitaande 2000 e 2002. Heen miliyaaruuji 10 ko toownaari (intereeji), ɗum firti ko hoorejawdi nde ko 14 miliyaar wonnoo. Ko ɗiin 14 miliyaarnjollanoo ekonte ganndiraade “ konte baleeje > ” (caisse noire) cosanoode gila e yonta Muttaar wul Daddaa : ɗee mbadiranoo ko huuɓnude soklaaji won ɗeen sirriyankooje biyeteede ” Sirru Dowla ”. Tonngoode konte ko 5702900. Kono nde yahnoo haa ɓooyi ɗe mbaɗti huutoreede ngam mooftude kaalisaaji baɗɗi luural, hade mum neldeede bankeeji tokoosi ɗi : huunde e ɗiin bankeeji woodii ko keɓi e oo ɗoo kaalis “majjuɗo ”, walla rewrii e mum en feewde e yimɓe teelduɓe.
Ko ɗum addani huundee gollooɓe faggudu (hommes d’affaires en) noddeede to Polis kalfinaaɗo anket o, ngam naamneede. Sikkaaɓe e oo doosiyee njettiima hannde e yimɓe 30. ina waɗi heen jaayndiyankooɓe. Ina wiyee ko ɓe ɗoo gollooɓe faggudu noddaa to wiɗtooɓe to ko Muhammed wul Buamatu gardiiɗo GBM, Muhammed I Abdallaahi wul Abdallaahi (MAOA) mo BAMIS e Iselmu wul Tajdiin mo BCI e Ahmed Saalem wul Buuna Muttaar mo BADH e Siidi Muhammed wul Hasidigar gardinooɗo ko fayti e hiisaaji to BCM saanga nde geɗe ɗe mbaɗi nde, Muhammed wul Amar, kam ne ko toon wonnoo kalfinaaɗo kalfinaaɗo ko fayti e eɓɓaaɗe. Kono kamɓe kala ɓe ɗaccitaa caggal nde ɓe keɗtaa. Ina wiyee gardiiɗo banke BCI o, hono Iselmu wul Tajidiin yoɓii miliyaaruuji ɗiɗi e 200 miliyoŋ ñalnde altine 23/11/09 nde. Ina wayi no ko maslahaa dañaaɗo hakkunde maɓɓe e wiɗtooɓe ɓee : ɓe njoɓa ɓe kisa.
So tawii oon maslahaa ina woodi, firti ko won ko mumaa wonande denndaangal ɓee ɗoo gollooɓe faggudu wallitnooɓe kuudetaa o, mballiti kadi Asiis nde woni kanndidaa e woote nde. Won wiyɓe : “ so tawii Tajidiin alaa ko ñaami, laamu fotaani wiyde yo ruttu kaalis mo o ñaamaani ; so tawii noon ko o ñaamɗo kaalis, yoɓde ndee tan fotaani yonde ”. Ɓe ɓeydi heen so tawii ko ɗii ɗoo maslahaaji won heen mbaɗantee, firti ko yimɓe ɓee potndaaka : “sariya wonande miskineeɓe ɓee ɓe ngalaa doole ɓee, jawdi mum en heɓtee, cokee, koynee, e sariya wonande joom en doole en, ɓe nganndu-ɗaa hay so tawii jawdi mum en wonaa laaɓndi ina mbaawi ɗum soodtirde wellitaare mum en, mbaasa sokeede, alaa ko haali ñaaweede ”.
Bookara Aamadu Bah
