Kurne waalo
Caggal nde guufli nguufti, cammeeje pulli bumangal, ɗe ƴoogi, demoowo ina heewi yahde ƴeewtoyoo ngesa mum, nde wonnoo colli ina mbaawi fuɗɗaade ŋoñaade cammeeje gila nde ngoni ƴoogooje. So o naatii he ngesa baa, o yirloto ba haba hawra omo sunnoo, omo ƴeewa so alaa ɗo colli puɗɗii ŋoñaade. O sunnoo mbate maa o yiy lilluɗe colli. So tawii o tawi colli puɗɗiima ñaamde cammeeje ɗee, omo waawi ñallude toon hiwde haa hiira. So o joftii wuro, o habra galle makko. So mo jogii kurnotooɗo, so weetii oon dawa gese hurnoyaade. Wona kurne puɗɗiima.
So kurne ngarii, ngesa fof ina waɗa neɗɗo walla yimɗe ɗiɗo haa tato. Kiwoowo ina jogoo lottundu walla karba. Won e maɓɓe ine njogoo catallaaji ina konnga. Ɓee heen ngalaa hay dara so wonaa daaɗe mum en.
Kurne so ngarii, gese ɓurata wuro yeewtude. Boombi e surgaaji e sagataaɓe e seemedɓe rewɓe fof ñallata ko gese. Nde wonnoo so colli keewaani, walla so colli ñallinii, boombi e sagataaɓe ina ndenta he lekki ñallirki walla caali. Gooto fof so ina ara helat cammeeje ɗiɗi walla tati addora. Ɗe caaɗnee haɗe caaɗa, ɓe lappa ɗe, ɓe ndaña monngo. Ko hono noon, so gese ina mbaɗi ñebbe, ɓe kuɓɓat duɗal, ɓe taƴa ñebbe kecce, ɓe mbaɗa ndampu. Walla tawa eɓe njogii barmeyel maɓɓe, ɓe pasna heen ñebbe ɗee. Ɓe ñalla ƴakkude mongo e hiñaade ñire.
So tawii colli ina keewi, ɓe ndentataa nde wonnoo gooto fof ina hersa hurnaade ngesa hawa. Kala jeebiiɗo haa hawraa, sukaaɓe e mawɓe fof ngonata ko e tooñde e yennude ɗum.
So yahii haa hiirii, joftol yontii, ko cente-cente sukaaɓe e mawɓe ina njoftoya. Sahaa nanaa kelle e jimɗi boombi e sagataaɓe e jeewte belɗe hakkunde laabi, nde wonnoo ko ɓe haarɓe monngo e ñebbe.
Won e remooɓe, so kurne jontii, eggat koɗa he dow gese mumen. Won e huurnotooɓe hoɗɓe to woɗɗi ngara luloo he hoɗɓe ɓee. So yahii haa hiirii, sukaaɓe rewɓe e worɓe, boombi e surgaaji ndenta mbaɗa dingiral no wonɓe he wuro nii.
Coñal waalo
So gese kurnaama gila e ƴoogooje, danwinɗe, monnginɗe, kammo njawo, haa yoora haa holita. Mawɗo kolangal e won e jom gese en, nannga tiwaande, ɓe taƴa ñalawma nde coñal fuɗɗotoo. Kala luulndiiɗo woni coñɗo ko adii ñalawma oo, ina nanngee wooda ko fawaa he mum. Mawɓe adiiɓe njiirannoo gawri makko.
Ñalnde lajal ngal timmi, tiwaande ndee gasi, gila jamma demoowo renndinta bafɗi, laɓɓe, ngoobaane e kala ko ina soña . Rewɓe ɓee ne ngona e renndinnde kaake doɓtirɗe ko wayi no cengele, taasaaji mawɗi, beñuwaaruuji e kala ko ina waawi renndinnde cammeeje. So gese ɗee ina ngoɗɗi, ɓe nawora barmeeji e kaake defruɗe. So tawii gese ɗee ngoɗɗaani, ɓe keewi ko defde ko wuro, ɓe njoknoya bottaari. Jom ngesa oo, ñalnde tiwaande nde gasata, yaha gese fitta gerngal mum haa laaɓa. Omo waawi waasde gernude he ngesa makko. Jom gese keewɗe ina mbaawi waɗde gerngal gootal. Kono gerngal maa reenee. Jom gerngal waalata ko sara gerngal mum reende jawdi e yimɓe ɓe nuunɗaani. So weetii, yimɓe fof ndawana gese. Ɓee ene coña, ɓeya ene ndoɓta, kono noon tan ɓe ngoorata haa hiira, so ɓe gasnaani ɓe ndartina ɓe poofto haa weeta. Joftoyooɓe ɓee njoftoya, kono maa won keddiɗo reena gawri ndii haɗe jawɗi yande heen, walla hoto wujjeede. So weetii, subaka law, ɓe kuudoo ɓe njoka golle maɓɓe haa beetewe, ɓe ndenta ɓe kacitoo, caggal nde ɓe njari kafe maɓɓe gila subaka. Oon sahaa gese ina njeewta saɗne, yimɓe fof nana gese. So coñal gasii, gooto fof njiimtii e jaawre mum, gawri ndii askee. Saateteeɓe ɓee caatee, ko heddii koo lappee maa sokkee, ceeri naattinee. Walla naatniree cammeeje, kala nde soklaa ittee heen sokkee. Jawdi rokkee ñaande ndee, gawri ndii waɗee he saakuuji. So gesee ɗee moƴƴii, gawri dañaama haa heewi, won e remooɓe njeeyat heen koltira. Won e maɓɓe coodata ko jawdi ndariidi. Rewɓe ɓee njeeyat caate mum en. Ɓe cooda cuɗaari walla comci gaaɓɗi.
So jom gese en ngasnii ñaaltinaade, jawdi naata kolangal, ñaayngal fuɗɗoo. Won e jom gese en mbaɗata ko haɗde, hay dara naatataa he ngese mum en, so wonaa jawdi mum en tan. Ɗuum noon ina adda sahaa hare hakkunde jom ngese en e aynaaɓe.
Siley Aamadu Bah
