Ñalnde 31 desaambar 2016 waktu sappaɓo subaka, e wuro Raaybani e nder komin Irkiis jooɗnde faytunde e sosgol Catal Fedde Ɓamtaare Pulaar Irkiis e gardagol Umar Soh wondude e teddungal mawɓe wuro Raaybani hono Muktaar Jallo e Abuu Sammba Bah. Caggal nde Ceerno Umar Soh udditiri Qur’aan, o haalii nafoore jaŋde, o hirjinii yimɓe ɓe nde ɓe njanngata ɗemngal ngal nde wonnoo ko ngal sodorde yaawnde wonande ɓe njanngaani ɗemɗe goɗɗe. Caggal hirjino yowitiingo e nafoore ɗemngal ngal, tawtoraaɓe ɓee toɗɗii yiilirde fotnde ardaade Catal ngal, siforiinde nii :
Yiilirde Catal Irkiis
- Hooreejo : Muusaa Jibi Taal
- Cukko hooreejo: Aysata Abuu Bah
- Koolaaɗo kuuɓal : Lamin Mammadu Sih
- Kalfinaaɗo jaŋde: Aamadu Mammadu Soh
- Kalfinaaɗo pinal: Mammadu Kowri Taal
- Kalfinaaɗo kumpital e jokkondiral: Hammaat Jallo
- Kalfinaaɗo juɓɓingol: Aliw Moktaar Kan
- Kalfinaaɗo ngalu e eɓɓooji faggudu: Umar Alsan Bah
Goomu horo
- Siidi Madaani Bah
- Abdel Asiis Soh
Cappanɗe nayi e njoyo neɗɗo naatii e catal ngal.
Ko noon kadi, ñalnde 1 saawiyee 2017, catal Fedde Ɓamtaare Pulaare Muritani sosaama walla mbiyen dartinaama to Barkewol. Batu kuuɓtodinngu cosngu catal ngal jooɗii ko waktu 3ɓo kikiiɗe e tawtoreede nulaaɗo Yiilirde Ngenndiire FƁPM, hono Maalik Aamadu Saar kalfinaaɗo eɓɓaaɗe e Fedde ndee. E joɗnde tan, fotde 100 tergal naatii fedde ndee, tee ina yaakoraa maa ɓe ngonoy, hedde 400 tergal.
Ɓe idorii ko yeewtude geɗe toɗɗiiɗe nguurndam fulɓe nokku oo, caggal ɗuum ɓe ndewni heen njettoor faade e Fedde Ɓamtaare Pulaar e Muritani sabu mum newnande ɓe cosgol catal ngal. Nde ɗum joofi, ɓe ndokki nulaaɗo fedde ndee konngol, oon waɗani daartol Fedde ndee gila sosaa haa e ñalawma mo ɓe ngoni oo, o jaabtii kadi naamne naamnanooɗe.
Caggal ɗuum, yiilirde aroore ndee toɗɗaama yo ardo catal ngal :
Yiilirde Catal Barkewol
- Hooreejo : Aali Alfaa Soh
- Cukko hooreejo : Aysata Aadama Bah
- Koolaaɗo Kuuɓal : Yero Sammba Soh
- Kalfinaaɗo Jaŋde : Umar Saalif
- Kalfinaaɗo Pinal : Abuu Galo Bala
- Kalfinaaɗo kumpital e jokkondiral : Haaruuna Yaayaa Jah
- Kalfinaaɗo Ngalu e eɓɓooji faggudu : Maamuudu Mammadu Soh
Goomu horo
- Koroowo Ngalu : Faatimata Aliu Soh
- Cukko Koroowo Ngalu : Aminata Jibi Jah
