Fedde Ɓamtaare Pulaar e Muritani, Yiilirde mum ngenndiire, Cate mum, denndaangal terɗe mum ina nduwanoo ɓesngu Jibi Hammee Lih duttiiɗo e joom mum ñalnde 16 ok- toobar to Canada.
Jibi Hammee Lih jeyaa ko e jagge cosnooɗe Fedde Ɓamtaare Pulaar e Muritani, gidiiɗe jannginde ɗemngal Pulaar e leydi men hee. Kanko Ceerno Jibi Hammee, omo jeyaa kadi e idiiɓe toppitaaɗe yeewtere Fedde ndee to Rajo Muritani. Nde Duɗal Ɗemɗe Ngenndiije sosaa e hitaande 1979 o halfinaa catal mum heblo. O woni heen haa nde o jaggaa e hitaande 1986, o sokoyaa Waalata, o sokdaa toon e yarham mum Teen Yuusuf Gey e Jiggo Tafsiiru. Caggal nde ɓe ɗaccitaa e hitaande 1989, woodi heen yaltuɓe leydi ndii, kono Jibi Hammee jeyaa ko e heddinooɓe e leydi hee, kayri fof e mettunoode wuurde e oon sahaa, kanko fof e yiynoode caɗeele teeŋtuɗe nder kasoo, baawnooɗe añtinde mo wuurde ɗoo. Fuɗɗitaade nguurndam e nder leydi ɗo nguurndam maa bonnanoo, wonaano huunde weeɓnde, kono Jibi Hammee waɗii ko ɓuri ɗuum, sibu Alla surii mo e mooftude kusummaaji e ɓernde makko…
Jibi Hammee meeɗaa hatteede e geɗe Fedde Ɓamtaare Pulaar e Muritani. Kala nde fedde ndee soklunoo jooɗaade, dame ekkol makko Jam Lih, ko ko udditanii ɗum haa njaaji. Kala nde fedde ndee noddi mo e golle, o nootiima, o addi heen ganndal makko e humpito makko ! Sankaare Jibi Hammee, ko baasal mawngal wonande Muritani, sibu Jibi meeɗaa luuteede kewu coñce e ñeeñal e leydi hee, o jeyaa ko e ɓurɓe humpitaade ɗeen geɗe. Ko baasal mawngal wonande fulɓe e Fedde Ɓamtaare Pulaar e Muritani. Guurɗo fof ko maayoowo, kono Jibi Hammee woppii yolnde mettunde sukkude.
Yo Alla yurmo mo, yaafoo mo, naatna mo Aljanna. Yo Alla luttu en caggal makko ko juuti !
Fedde Ɓamtaare Pulaar e Muritani, Yiilirde mum ngenndiire, Cate mum, denndaangal terɗe mum ina nduwanoo ɓesngu Yaayaa Saalif Ɓaas duttiiɗo e joom mum jofnde aljumaa 16 oktoobar ɗoo e Nuwaasoot. Yo Alla yurmo mo, yaafoo mo. Yo Alla haarnu mo Aljanna.
