Ñalɗi golle njuɓɓinaama tuggi 23 haa 27 sulyee 2007 to Ndakaaru ngam miijaade ko yowitii e « cemmbingol mbaawkaaji rewrude e jaŋde mawɓe e jaŋde nde wonaa jaŋde laamu e nder Afrik ». ƴuɓɓini ñalɗi ɗi ko ISESKO hono Dental Islaamiyankeewal jaŋde e ganndal siyaas e pinal) e UNESCO. Ko leyɗe nay : Senegaal, Mali, Burkinaa Faso, Niiseer tawtoraa ɗee golle kimmuɗe. Ooɗoo sifaa jaŋde mawɓe tuugii ko e piɓle garooje ɗe, ɗum ko gaa-gaa jaŋde binndol e hiisa, golle baawɗe naftude janngooɓe e nguurndam mum en ñalnde kala mbele aɓe ɓeydoo softande ɗum, ɗum battina no moƴƴi e ngonka maɓɓe. ;iiɗoo ñalɗi kadi ɓurnoo wonnde faandaare mum en ko « winnditaade denndaangal humpitooji goodaaɗi ngam lelnude tuugnorgal nanondirangal hakkunde ɗee leyɗe. Fayndaare nde ko waɗde feere mbele ko famɗi fof feccere e mawɓe ina ɓooroo humambinnaagu ɗo e hitaande 2015 (ɗo e duuɓi jeetati). Ñalɗi ɗi ina njahdi kadi e tuugnorgal biyeteengal Life ngal UNESCO lelnani leyɗeele 34 ɗo ko ɓuri feccere e yimɓe ngondi e humambinnaagu.
Fayndaare Life ko « Anndude ngam waawde », tee ko « waɗirde no jiidaa » e ko woowanoo to bannge jaŋde mawɓe. Ɗum noon ko ngam « dowlinde mbaydi golle moƴƴiri ». Ko leyɗeele nay njeyaa e tuugnorgal Life e nder Afrik, ɗeen ngoni tawtoraaɗe ñalɗi ɗi. Sikke alaa ɗumɗoo fof waawaa gasde tawa wonaa e ɗemɗe joom mum en ɓe, ɗe nafoore jaŋde mum en haaɗaani tan e mumtugol humambinnaagu, kono ina njoopii mahtagol pinal men.
