Ñalnde 13 sulyee 2008, hooreejo leydi Muritani hono Siidi wul Seek abdallaahi yeewtidii e yonaaɗe Fedde wiyeteende CAMME (Fedde renndinnde militeeruuji mooliiɗi). ɗum ko tawi omo yahi toon tawtoreede Batu leyɗe kuufɗe Mediteraanee. ƴeewtere maɓɓe yowitinoo ko e haala ñawndugol warhooreeji e tuugaade e wasiyaaji ñalɗi diisnondiral jooɗinooɗi ɗooyene e Muritani ñalnde 20-21-22 noowammbar 2007.Ardiiɓe Camme kollitii kulhuli mum ko fayti e ñawndugol ooɗoo gagga. Ɓe teeŋtinii hoolaare maɓɓe e mawɗo leydi ndi, ɓe kolliti ɓe njawaani ko fuɗɗii waɗeede ko. Kono tan jiiɓru hannde ndu ina faayni ɓe sibu saabiiɓe ɗum ɓe ko nafooje mum en keeriiɗe njiylotoo, njiylaaki nafoore leydi ndi. Ɓe njiŋii heen ɗiiɗoo depiteeji ɗi « nganndu-ɗaa kam en fof njeyanoo ko e laamu mbonnunoongu leydi ndi. Ina wayi no ɓe kollitii wonde hooreejo leydi heɗimaama ɓe no moƴƴi. Ɓe njettii mo heen no feewi.
Dental Orop e nanondiral awo
Diiso leyɗe jeyaaɗe e Dental Orop (UE) sifii nanondiral waɗdunoo e Muritani ko fayti e awo. Ngaal nanondiral noon toɗɗii ko daawal 1 ut 2008 haa 31 sulyee 2012. Termondiranoo ngalɗoo nanondiral paayodinngal ko jaagorɗo awo jatuɗo o, hono Sumaare Hasan. E nder ngaal ɗoon nanondiral Orop ina usta ko nanngatnoo e liɗɗi men : ɓe ngawatnoo ndeen ko 440 000 ton. E nder ngalɗoo nanondiral ɓe poti awde tan ko 250 000 (so a welaama mbiyaa feccere). Wonande liɗɗi biyeteeɗi sefaalopod, ko ɓe poti awde ko ustiima nayaɓal ko ɓe ngawatnoo ndeen. Wonande leñol liɗɗi biyeteengol ‘demersaal’ ko ustii ko, ko hakkunde 10 haa 50 e nder teemedere. Wonande won ɗiin liɗɗi tokoosi ko ustii ko tolniima e 43%. ɗum ɗoo noon feccata ko ɓe taƴanaa e ɓe nannga e liɗɗi men ko, ko Espaañ, Portigaal, Farayse, Itaali e Geres. E nder ɗuum, Dental Orop (UE) ina foti wersude Muritani fotde 305 miliyoŋ Ooroo (107 miliyaar ugiyya) e nder duuɓi nay ɗi, woni fotde 27 miliyaar ugiyya hitaande kala. ƴantude e ɗuum eɓe njoɓa njoldi, fotde miliyaaruuji joy ugiyya hitaande kala. Maa Dental Orop wersu Muritani fotde miliyaaruuji 6 ugiyya ngam wallitde tuugnorgal nehngo liɗɗi (aŋuaculture). Ma ɗum wallit kadi coodgu laaɗe awo tokoose. Bayyinaa ko to Bruxelles ñalnde 17/7/08.
