Catal Fedde Ɓamtaare Pulaar to Nuwaadibu diidi ñalnde 2 settaambar 2019 galle mun ganndiraaɗo Duɗal Aamadu Umar Jah. Eɗen mbaawi wiyde ko ngoƴa fedde ndee e catal ɓooyɗo laatii ɗoo, tee eɗen njenanaa mahngo oo galle maa ɓeydu feeñninde darnde e faayiida catal ngal, ngal daña kadi nokku ɗo ngal janngini, ɗo ngal bati, ɗo ngal moofti defterdu maggal e kaɓirɗe maggal informatik, tawa ina kisa e ɗo yuɓɓinta kewuuji maggal keewɗi. Maa ɗum naftu to bannge hisnude kaɓirɗe eɓɓaande Catal ngal gollodinoo e Dental Orop (UE) wiyeteende « Eɓɓaande dowla nuunɗal ». Catal ngal maa wowo ko yoɓatnoo e kasdi joɗnde Catal ngal, sibu mahdi ndii ina waɗi saloŋ mawɗo (meeteruuji 9 njuuteendi e meeteruuji 4 njaajeendi) ɗo batuuji e heblooji mbaawoyta yuɓɓineede.
Catal ngal ina eeroo kala woƴaaɓe galle oo nde ngaddata ballal mum en e mahngo hee, hay saak simoŋ yawnaaki tee yawetaake. Catal ngal ina yetta kala wallitnooɓe e golle hee, gila e diidngo haa e balle e miijooji. Catal ngal ina yetta terɗe mum darinooɗe, dariiɗe laŋ haa hannde, haa golle ɗee mbaawi yettaade ɗoo. Njettoor kadi feewde e haralleeɓe mahngo ɓee e fitiramgolleeɓe ɓee.
Abdul Ajiiju Bah, hooreejo catal FƁPM Nuwaadibu
