Fedde winndereyankoore nde wonaa laamuyankoore anndi- raande FLM, haa arti e catal mayrewonnde he diiwaan Gorgol (Kayhayɗi), e gardagol Huley Mboh, ene yuɓɓina toon golle ɓamtaare paayodinɗe, koybinɗe caɗeele yimɓe dowri ɓe.
Fedde nde ene udditi toon duɗe pulaar jeegom e nder ɗeeɗo gure : Palingal, Yaalalɓe, Seyyeen Gababe, Siñcu Bumak, Giray, e Siiwe, tawi jannginooɓe ɓe ko heblaaɓe heblo yuɓɓungo, caggal nde ɓe ndañi fartaŋŋe ƴetteede e kawgel jannginooɓe ngel FLM yuɓɓinnoo to wuro Nuwaasoot e hitaande 2006. Tuma nde ɓe ndaaƴi kawgel ngel, jannginnooɓe njeegom ɓe kala nawa e nder gure kaalaa dow ɗe dow ɗe, ngam ɓe ngona toon lebbi jeegom, eɓe njanngina fuɗɗotooɓe. Nde dumunna o timmi e Noowaambar 2006, ɓe ƴettitaama kadi, ngam jannginde tolno 1 e 2 kala, hakke lebbi jeegom goɗɗi (deesaambar haa mee 2007). Te jannginooɓe ɓe ene keɓa njoɓdi cemorndi, ndi hay fedde woɗnde yoɓataa. Ina teskaa wonde jaŋde nde ina samori no feewi, sabu ɓe njiyataano binndol mbaɗtii yiiyde, yiyatnooɓe ɓee ne ɓeydiima.
Yanti heen kadi ɓe mbaɗtii hiisaade, te ɗuum ko huunde nafoore no feewi e nguurndam aadee. Ko FLM soodaani gure ɗe defte taro, e hiisa, e celluka, e kayeeji, ekn….
FLM haaɗaani tan e jannginde, sabu ene wallita gure ɗe e masiŋaaji ilnooji mbele yimɓe ɓe ne ngolloroo e gese walla e sardiŋŋaaji, ene wallita e aawdi, kam e gollorɗe goɗɗe goɗɗe, ko wayi no rooswaaluuji, ekn… FLM ene udditi kadi jeeyirɗe, tawi ko kam tottata gure ɗee kaalis mo ɓe coodiri marsindiisuuji maɓɓe, ko kam mahata nokkuuji jeeyirɗi ɗi. FLM ne mahana gure ɗee kadi nokkuuji ɗo rewɓe ɓe ndentata, ina ngoma ko fayti e goobu walla e ñootol. Mbiyen kadi, e kala lewru, FLM soodantu gure ɗe jaaynde Fooyre Ɓamtaare. E nder ndeen jaaynde, yimɓe gure ɗe ene keɓa kabaruuji paayodinɗi peewtuɗi e kabaruuji leydi ndi, e cel- lal, ekon.
Yimɓe ɓe ne poti teskaade darnde faayondinnde nde Huley Mboh darii ngam wallude banndiraaɓe ɓe e golle ɓam- taare Ɗ ina laaɓi so woɗɓe wayɓe no makko ndañaama ma won weltaare wonande leñol ngol. Haa jooni to diiwaan Gorgol o, Catal Fedde Ɓamtaare Pulaar to Kayhayɗi, e gardagol Sammba Gata Bah, ne darii ngam ɓamtude jaŋde nde, e nder diiwaan he. E dow ɗuum, eɓe ɗaminii, e ballondiral Fedde nde wonaa lam- muyankoore wiyeteende Dulos, udditde duɗe nay (4) e daawal lebbi jeegom (6), tuggi lewru suwee 2007 haa noowaambar 2007, tawa jannginoowo kala ina heɓa huunde, e lewru kala, wondude e ballal yimɓe duɗal ɓe, so dañaama. Duɗe ɗee, ko catal ngal rewintoo ɗe haa daawal ngal timma, fedde Dulos noon, ko ballal tan tottata catal Fedde Ɓamtaare Pulaar.
Muusaa Jibi Taal, kebloowo e ɗemngal pulaar. moussatall2003@yahoo.f
