Go’o ko rewɓe nayo ina njolda e Laawa Weeyo Winndere (ISS). Idii jolde heen ko debbo Riisinaajo biyeteeɗo Svetlana Terechkova, wattindii ko Samantha Cristoforetti. Idii yettaade toon, ina joli e laanel Riis en biyeteengel Soyuus, ko debbo Ameriknaajo biyeteeɗo Tracy Caldwell Dyson. Ko kanko jaɓɓii toon, ñalnde alarba 7/4/10 rewɓe tato (Ameriknaaɓe ɗiɗo e Saponnaajo gooto) yahnooɓe e laanel Amerik biyeteengel Discovery. Ɓeen rewɓe ngoni Dottie Metcalf-Lindenburger, janngintunooɗo ganndal tago (duuɓi 34) kam e Stephanie Wilson (duuɓi 43), aasiñoor ko fayti e laaɗe diwooje, ngol woní laawol makko tataɓol, e Naoko Yamazaki (duuɓі 39), beeyo sapponnaajo. Nii woni, e nder ɗee ɗoo balɗe jeenay, hade laanel Discovery seŋtaade e ISS, maa ka jolnu fotde 13 neɗɗo (ameriknaaɓe 8, Riis en 3, e Saponnaaɓe 2) laawol gootol. Faayndaare ngal ɗoo ɗanngal ko nawde nder laana he fotde tonuuji 6 kaake : ina heen suudu ɗaanordu woɗndu, suudu niɓɓuru (chambre noire) ɗo fotooje ngolletee, e armaaruuji jarribooji ganndal siyaas (nguurndam, Simii, Fiisik, safaara …), kam e kaɓirɗe goɗɗe.
Ina e porogaraam maɓɓe kadi yaltude laabi tati nder weeyo. Caggal ngal ɗoo ɗanngal, laanel NASA Discovery ngel maa rutto toon kadi laabi tati e hitaande nde :e lewru mee, e sulyee e settaambar, hade Soyouz (laanel Riisi) heɓtude golle ɗe, kam tan waɗta yahde to laana weeyo ISS ka. Ɗum ko hade laanel goɗngel feewneede (kono ngeel ko julorgel) hedde hitaande 2015.
Bookara Aamadu Bah
