Booñ Adunanke Kopporeeje (Fond Monetaire International-FMI) jaɓii tottude Muritani ballal 80 miliyoŋ dolaar (fotde miliyaaruuji 20 ugiyya). Habri ɗum ko Amor Tahari, cukko hooreejo FMI, ñalnde alarba 16 settaambar to RNATI Nuwaasoot. Amor Tahari arii Nuwaasootgila 8 lewru ndu ngam heblude garaangal e leydi he lappol FMi potngol yeewitde e Muritani. O hollitii wonde FMI fellitii ƴettitde gollondiral mum e Muritani. E wiyde makko, Muritani ina wondi e caɗeele teeŋtude, sabu ngonka winndere nde e hoore mum, sabu kadi kuudetaa 6 ut 2008. O holliti iwonde FMI ina wondi e payndaale kese ƴellitaare ɗe leydi ndi yiɗi tabitinde ɗe. Yiɗde maɓɓe noon ko yo geɗe ɗe laaɓtu, tuugoo e hiisaaji celluɗi e nuunɗal, tee omo yaakorii ma leydi ndi seertu e aadaaji wondunoo, sibu, ko ina wona duuɓi 10 jooni, leydi ndi rokkatnoo FMI ko limooje e kabaruuji ɗi ngoodaano, walla mbiyen ko ko fenatnoo. O faamninii kadi to 80 miliyoŋ biyeteeɗo o ummii. Ko kaalis mo leyɗe galɗuɗe keewi ñamlude leyɗe ɗe kiris adunanke yettii, mbele ina mbaawaa yoɓde ñamaale walla soodde won ɗeen geɗe e nder leyɗe ƴellitiiɗe. Yonaaɓe FMI e guwamama Muritani ina kawri wonde ko fuɗɗoode kaaldigal woni ɗo, ngam heblude lelnugol tuugnorɗe kese. Ko ɗum addani jaayndiyanke Muritaninaajo, biyeteeɗo Iselmu wiyde wonde “ FMI rokkii Muritani ndewnel ” sabu makko famdinde ɗum. Ko nii Amor Tahari lelniri huunde nde.
Yoogirde : APA
Bookara Aamadu Bah
