Hugo Chavez, hooreejo leydi Venuzuela, wiyi ina heɓii mahde nder Muritani isin ciggoowo pеtroŋ ngam huuɓnude soklaaji mum ko fayti e isaas e gasuwaal, e waɗtude yeeyoyde ɗum to Mali e Niiseer. Ɗum ɗoon noon so woodii wonde, ina ɗaminaa maa waɗ ngartam moƴƴam e leydi ndi : to bannge ndimaagu mum, to bannge gollingol yimɓe e to bannge coodgu, sibu ina waawi njaru mum ustoo, haa teeŋti noon, so tawii ko petroŋ men ƴoogeteeɗo ɗo o, wayletee ko he oon isin. O wiyi “ maa min mah siggirde e Muritani, ngam waylude denndaangal petroŋ maɓɓe, walla nii min itta mo to Venuzuela min mbayla mo e oon isin ”. O fawti heen : “ Muritani ina yeñtina fotde 18 000 baril ñalawma kala. Ko sosiyatee gooto nawata ɗum, wayloya ɗum to mi anndaa. Ma min ndokkit petroŋ e nder Muritani, e to Mali, e to Niiseer. Huunde e leyɗe Afrik ina njokkondiri hannde e Venuzuela walla ina njiɗi ɓallitaade Alba (Alliance bolivarienne) ».
Ina gasa tawa ngoo miijo arani mo ko Tiripoli to o yahnoo tawtoroyeede Batu Dental Afrik, ɗo o fotti e Wul Abdel Asiis, hooreejo leydi Muritani. Leydi makko ina foti kadi yuɓɓinde batu hakkunde Afrik e Amerik worgo e maayirɗe lewru settaambar. Ina wiyee wonde Venuzuela ina yeñtina fotde miliyoŋaaji tati baril e nder ñalawma gooto. Ndii leydi jeyaa ko e leyɗe ɓurde heewde petroŋ. E ndi yeeyaa petroŋ mo waylaaka e “coggu yiɗande” maayngu e nder leyɗe 17 Amerik hakkundeejo e Karayb (Caraibes), gila 2005.
Bookara Aamadu Bah
