Blaise Compaoré, hooreejo leydi Burkinaa ko jillinooɗo Koddiwaar. Kanko woni dogoowo e maslahaa hakkunde koddiwaarnaaɓe. Gila nde wiyaa woote gardagol leydi ndi pellitaama waɗeede ñalnde 29 noowammbar garoowo o, heewɓe ngoongɗinaano, nde tawnoo pokki ɗi keewii no feewi. Nguu ɗoo njillu Blaise waɗi Koddiwaar jaggiraa ko no beldital hakkunde hooreeɓe leyɗe ɗiɗo ɓee. Gooto e maɓɓe kala ina etoo hollitde wonde luural gonnongal ɗoon ngal diwtaama.
Ɗum fuɗɗii ko gila e “ nanondire Wagadugu ” nana wona duuɓi ɗiɗi jooni, Blaisė natti yiyreede no ɓallitoowo rebel en, wonti dogoowo e maslahaa. Gila Gbagbo toɗɗaa hooreejo leydi Koddiwaar e hitaande 2 000, ko ngol woni goo ko koyɗe Kompaawore ina ndaroo toon. Jahgol Kompaawore haa wuro ɗo Gbagbo jibinaa ɗo, kam e nanondirde ɓe kadi mahde laawol hakkunde Yamusokoro e Wagadugu ina njeyaa e geɗe gaddande njillu ngu jiyreede no beldital hakkunde ɓee haɓdiiɓe. Nde ɓe njahi hirtoyaade galle laamorɗo too kadi, Kompaawore wiyi toon “ ɗum ko kawrital hakkunde musidɓe e ɓiɗɓe yumma ”. “ Ko goonga min ndukdiino haa woɗɗoyi (…), hannde noon amin pelliti gollodaade ”. Hooreejo Burkinaa kam ne hollitii wonde “ Tuggi kitaale 1980 haa e ñalawma hannde o, hay nde luural hakkunde amen teeŋti nde, haɗaani min haaldude nde tawnoo amin nganndi ko ko ɓennata, ko duleendu tan wonnoo sibu amin nganndi ko minen njiydi nafooje ”. So tawii ina laaɓi ɓe mbelditii, laaɓaani tawo lajal woote battiniingal dotteede ngal maa ɗoofte. Sibu nde ɓe naamndaa mbele maa woote nde mbaɗ nde wiyaa nde, ɓe njaɓaani haalde ko laaɓi. Ɓe keɓii wiyde tan wonde wonaa waɗde woote ɓuri himmude, ɓuri himmude ko “ ko jokkude golle ”. Kaaɗoo haala noon naatnii sikkee hakkillaajiyimɓe heewɓe : mbele wonaa e heblude hakkillaaji ngam dirtinde woote ɗe kadi ? Ellee ko ɗum Blaise yiɗi haalde nde wiyata wonde “ waasde heñaade tawa ina moƴƴina ɓuri heñaade tawa feewaani ”. Ko laaɓi tan, golle ɗee cuwaa tawo parde, sibu hay doggol wootooɓe ronkaama yo yaltu, tee golle goɗɗe keewɗe ina keddii.
Bookara Aamadu Bah
