Goomu jam e kisal Dental Afrik rokkii kapiteen Muusaa Dadis Kamara Kam e yahdiiɓe mum lewru, mbele ina kunoo, e binndol, waasde wonde kanndidaaji e woote gardagol leydi potɗe yuɓɓineede e lewru saawiyee to Gine. So tawii ɓe njaɓaani, Dental Afrik maa faw kuuge e militeeruuji baɗɗi kuudetaa ɗi kam e siwil en wallitɓe kanndidatiir Dadis Kamara.
E nder ɗuum Goomu kisal ngu wasiyiima militeeruuji Muusaa Dadis Kamara Gine nde ɗooftotoo ko kuninoo ko. so waasde wonde kanndidaa e hay woote goote. Ɗum ɗoon ko sabu haala Muusaa waasde laaɓtude e dumunna jawtuɗo o. Ina laaɓi yimɓe nii wonde ko o pellitɗo wonde kanndidaa. Nde o haali ɗum gadanol yeeso Goomu jokkondiral (Groupe ɗee Contact), ɓeen mettiniino heen no feewi. Farayse to bannge mum, ñaagiima Muusaa nde ɗooftotoo ko huninoo ko, kono haalaani haala kuuge. Heewɓe mbiyi wonde haala Farayse ka “ ko itti feloore tan ”, sibu ko kamɓe mballata denndaangal yaɓɓooɓe Doosɗe leydi e nder leyɗe mum en (Muritani, Niiseer, Gabon…), ɗum noon haala Farayse huutortaake. Hay Abdullaay Wad, mo meeɗaa suuɗde cehilaagal mum e Muusaa, wattini ko ɗaɓɓirde mo « nde o waasata wonde kanndidaa« , kono tan, yimɓe fof ina nganndi, ina famɗi goongɗinoowo mo e ɗuum. Heddii ko mbele ɗee dille fof maa paaynu Muusaa, paamɗo tigi-rigi hol ko waawi gasde e oo ɗoo yonta, potɗo yenaneede wonde ɗum fof ko gubbe tan, sibu sinno wonaano ɗum Seneraal Abdul Asiis polluɗo laamu hooreejo toɗɗaaɗo e woote ɗe ngalaa guli, woppetaake wona kanndidaa, haa teeŋti noon kadi Doosđe Dental Afrik kam e koye mum en ina kaɗi baɗɗo kuudetaa jeyeede e woote gartirooje e dagaare doosɗe. Yanti heen, omo jogii “ baabiraaɗo jontaaɗo ” so Abdullaay Wad, mo suuɗaaki moggaaki, ina wallita kala kuudetaa e Aduna he.
Bookara Aamadu Bah
