Jaagorɗo geɗe nder leydi habrii ñalnde 30 ut ɓennuɗo o wonde Aali Bonngo Ondimba hawii e woote gardagol leydi Gabon. Nii woni ɓiɗɗo ronii baaba mum. Kono tan luulndo ngo jaɓaani. Sibu e miljo maggo, woote ɗee ko gujjaaɗe. Ina feeñi noon, e nder diiwanuuji ɗi kala, ko Aali ari yeeso to woɗɗi. Aali huniima laamanaade Gabonnaɓe kala. Nde o yettii to jooɗorde kampaañ makko ɗo, o wiyi : “ ko yimɓe fof ngonan-mi ”. O ɓeydi heen : “Miɗo sifotora ɗo hannde Leon Mba, coso leydi Gabon miɗo siftora ɗoo hannde baaba am, gaawɗo jam e kisal e nder leydi am. Miɗo wiya denndaangal Gabonnaaɓe ngotanaаno-mi wonde ma mi daro e wootiɗinde yimɓe kala. Miɗo hormii ɓe mbaɗdatnoo-mi woote ɓee, sibu ɓe mballitii demokaraasi ”.
Holi Aali Bonngoo ?
Aali Bonngo yahrata ko e duuɓi 50. Kanko woni afo Umar Bonngoo, bammbuɗo mo ko ina wona duuɓi 20, walliti mo ha o heɓi ɗo o heɓi hannde ɗo. O janngii to Farayse ko fayti e sariya. Nde o arti o gollii e kabine (Cabinet) baaba makko tuggi 1987 haa 1989. Nde baaba makko nomi mo jaagorɗo jokkondiral, omo yahra e duuɓi 29 fat. Kono, nde tawnoo Doosɗe leydi kese ɗee ina carɗini ko famɗi fof duuɓi 35 ngam waawde wonde jaagorɗo, o dimosini. Gila 1990 ko o depitee. Ko e hitaande 1999 o arti e guwarnama, o nomaa jaagorɗo Ndeenka leydi : o wonii heen duuɓi sappо. Nde parti makko, hono Parti Demokaraasi Gabon (PDG) toɗɗi mo yo o won kanndidaa e gardagol leydi ndi, heewɓe ngeddi, njalti parti o. Aali Bonngo noon artaani Baaba mum jimme. Caggal nde wiyaa o foolii, seppooji keewɗi mbaɗii, haa arti noon e wuro wiyeteengo Port Gentil, ɗo woodi maayɓe. Kanndidaa biyeteeɗo Pierre Mamboundou gaañiima heen, tawi ina njaggondiri e polis. To Port-Gentil seppooɓe ɓee njani ko e konsulaa Farayse, nduppi ɗum. E miijo maɓɓe ko Farayse addi ɗe bone kala.
Bookara Aamadu Bah
