Jaayndiyanke Iraknaajo ɓerlinooɗo persidaa Buush paɗe o, yiɗi hoɗtoyde ko Suwis
Oo ɗoo jaayndiyanke iraknaajo biyeteeɗo Muntaseer Al Saydi, lolluɗo hannde sabu mum suusde werlaade persidaa Amerik, hono George Bush, paɗe hollitii yiɗi hoɗtoyde ko leydi Suwis : “ miɗo yiɗi yahde Suwis sibu ko leydi njaambureeri, tee ko leydi ndi wallitaani njangu e leydi Irak ”. Ó holliti kadi ina jeyaa e darnde makko hannde, renndinde Iraknaaɓe mbele ina ngullitoo to ñaawirde winndereyankoore, mbele ina ñaawa Buush e denndaangal wallitnooɓe ɗum, sabu “ warhoore wolde e warhoore keɓtugol leydi Irak ”. Muntaseer ko e ñawanooɗo kasoo hitaande, sabu “ yande e hooreejo leydi gonɗo e njillu golle ”, kono o waɗi heen tan ko lebbi jeenay o woppitaa sabu nehdi makko e nder kasoo he. Omo darji hannde, omo horsinaa e nder leyde aarabeeɓe. O werlinoo Buush paɗe ko ñalnde 14 desammbar 2006, o fawti heen wiyde ɗum “ rawaandu ! ” O wiyi wonde o leeptaama no feewi e kasoo o dummbanoo ɗoo : o wiyi o seŋaama kuuraa, o lappiraama ɓoggi kuuraa e ɓooli jamɗe, o werlaama e jaangol. Nde musidɓe makko ngari jaɓɓaade mo o wiyi ɗum en wonde “ o yiɗnoo ko yoftanaade waraaɓe e wolde Irak, mi dañii oo fartaŋŋe, mi jaɓaani o ɓoccitoo mi ” ! “ Njiɗnoo-mi nde mberlotoo-mi oo barhoore paɗe ɗe, ko suurtude penaale makko gadande ɓe yande e leydi am ”. Gila o nanngaa kanko Muntaseer, omo lolli e nder leyɗe Aarabeeɓe ɗo o seeraani e yuɓɓinaneede seppooji to Rabaa, to Keer, to Gasaa, to Londres… Yimɓe heeriiɓe walla laamɓe, ko wayi no Sheekh Hammaad Ben Khalifa Al Tanii, amiiru leydi Kataar, podanii mo otooji e pucci e galanuuji nde o yalti kasoo fof. Won baabiraaɓe kadi njokkondiri e jiknaaɓe makko mbelę omo resa sukaaɓe mum en rewɓe, nde tawnoo o wondaani e galle. Nde o ñaawetee nde o wulaani sibu o wiyi “ kanko saabii warngooji, ɓesngu am, minne ne arii e am waɗde huunde, no foti fof, ngam yoftanaade ɓee waraaɓe ”
Bookara Aamadu Bah
