Jagge Jakka Ngenndi Senegaal yeftii e kuuɓal baylowal Doosɗe leydi ndi. Ngal kuulal kesal sosii jappeere Cukko Hooreejo leydi nder Senegaal. Terɗe Jakkaa piilii kuulal ñalnde Aljumaa 15 Mee 2009 nder batu kuɓtidinngu. Ko adii fiilngo ngo, ɓe ndukdii sanne, ɓee heen ina ngonani miijo ngoo, woɗɓe ɓe mbiyi ko ɗum soklaani ngati won ko foti woƴde laamu e Hooreejo mum, ko wonaa ɓeydude jappeeje ɗe ngalaa nafoore.
Eɗen ciftora Abdullaay Wad wiyiino ñalnde 4 Abiril 2009, omo yiɗi rokkude rewɓe jappeere Hooreejo Jagge laamu maa Cukko-Hooreejo leydi. Ɓayri noon gorko waɗaama Hooreejo Jagge, heddii ko tottude debbo Cukko Hooreejo leydi. Ɗuum noon alaano e Doosɗe leydi ndi. Ko ɗuum addani ɗe wayleede. To Jakkaa too, addi eɓɓaande kuulal ngal ko Madikke Naŋ, Jaggal Laamu kalfinaangal ñaawooje. Wiyaa heen ko Hooreejo leydi toɗɗotoo Cukko Hooreejo, ko kanko kadi ittata mo. Kono noon mbaawka Cukko Hooreejo ina raɓɓini sanne. Madikke Naŋ wiyi : “ …wonaa kanko dottata laawol dawrugol ngenndi, o ardotaako batu Jagge Laamu, o jaɓɓotaako Jooɗantooɓe leyɗe mum en nder Senegal, o neldataa Jooɗantooɓe Senegal nder leyɗe godɗe… ”.
E wiyde makko haa jooni, ɗaminaa e Cukko-Hooreejo leydi ko “ wonde sara ɓesngu, heɗoo ɗum en ” arta haаlana Hooreejo leydi. Diwaa ɗoo dakkaa ɗoo. Ndeke ina anndaa ko o waawaa waɗde kala, kono hay gooto anndaa ko o waawi gollaade.
