Fedde Sifaa Hanki Pinal Hannde yuɓɓinii kiirɗeeli ɗiɗi e nder Nuwaadibu ñalnde 30 lewru Abriil to galle FBPM catal Nuwaadibu, e ñalnde 1 mee to leegal Laawoyna e ballondiral e catal fedde FBPM (Goomu Ngatamaare) e fedde sukaaɓe Kundel.
Ko idii eɗen naatana ko yuɓɓinaa e kiirɗeeli ɗi, ndutto-ɗen seeɗa е nguurndam fedde nde. Fedde Sifaa Hanki Pinal Hannde ko fedde pinal renndinde sukaaɓe e mawɓe, worɓe e rewɓe, sosaande e hitaande 1976 to Nuwaasot, heftinaande e hitaande 2005 to bannge laamu. Ardii fedde nde hannde ko Jaak Mammadu Yero. Gila nde sosaa, nde meeɗaa seerde e gollanaade leñol ngol ko fayti e pinal fuIɓe e ƴellitde ɗemngal pulaar. Hanki, e sahaa naange wulnge, ɗum jeyanoo kо е payndaale fedde nde ngam ƴellitde demngal ngal e rewrude e tinndinooje e njalniikaaji ekn… e dow yarlitaare mawnde, е tampere mehre, terɗe fedde nde sibu alaa ngartam wonani ɓe heen, walla mbiyen alaa njoɓdi.
Hannde noon, ko aduna kesam-hesaagu, alaa e sago kala ko ummanaa maa yahda e ngaluuji, so wonaa ɗum tan woɗɗoytaa. Ɗum tagi kamɓe fof e wonde hatanteeɓe e jogaade yarlitaare mawnde ngam ƴellitde leñol ngol, hannde won jiyanɗe goɗɗe ɓe njogii e fedde nde. Sibu pulaar ena wiya mawɗo amantaa mehre. Ɗum tagi fayndaare maɓɓe arwaniire ko werlaade cammbale ngam awde pelle ɗe ngonaa laamuyankooje mbele ina mbaawa wallude fedde nde haa waawa yettinde doŋle ɗe roondii ɗe, waawa fukkude e dow jam, tawi terɗe ɗe fof ena keddii e fedde nde, ɗum yiɗi wiyde tan, tawa mo woni fof won ko fedde nde jibinanta ɗum. E nder ɗum won gootal e cammbale ɗe awi wootere e pelle ɗee ngonaa laamuyankooje, barjitii ɓe huude e kaalis haa ɓe mbaawi jogaade miijo waɗde njillu maɓɓe ngadanu ɗo e nuwaadibu, haa ɓe mbaawi yuɓɓinde kiirɗeeli pinal, tawi lowdi ndi ko yiɗde haɓaade rafiiji rewɓe e daranaade kisal mum en. Sibu so tawii en ngartii e kiirɗeeli ɗi, en ƴeewii ko yuɓɓinaa e majji ko, maa en taw ko ɗum tigi woni darnde maɓɓe.
E jamma gadanoo, idii fof ko konngol udditirgol hiirde nde, ngol musiɗɗo Hammaat Joop waɗi ngam bismaade banndiraaɓe arɓe tawtoreede hiirde nde, rewi heen ko konngol musiɗɗo Umar Bah, holliti weltaare mum e hiirde nde e doggol ko jogori yuɓɓineede e hiirde nde, caggal ɗum hooreejo catal FBPM Nuwaadibu, hono Kan Aamadu Saydu ɓami konngol ngam hollitde weltaare mum e garaangal Fedde Sifaa Hanki Pinal hannde е Nuwaadibu, e bismaade denndaangal banndiraaɓe arɓe tawtoreede hiirde nde, o ñaagii Geno toowɗo o nde hiirde nde yahrata no haanirta nii, o wasiyii banndiraaɓe yo njangat Pulaar ɗemngal men. Refti heen ko jimol Fuuta tooro ngol goomu Ngatamaare Waɗi. Golle Kiirɗeeli ɗiɗi ɗii fof ko yuɓɓinaa heen gila e tinndinooje haa heɓi njalniika fof fayti ko no mbiyruno-ɗen nii ko haɓaade yoga e rafiiji rewɓe e no ɓe poti reentoraade mbele aɓe kisa e won e rafiiji.
E kiirɗeeli ɗi, ɓe ndokkii heen wasiyaaji mawɗi, ko wayi no tuppo, dewle sukaaɓe rewɓe tokosɓe, ɓe ndañaani duuɓi 15, haa heɓi deedi ɓadondirɗi ekn. Ко hono noon ɓe njuɓɓiniri heen tinndinooje waaju ko wayi no baasal (rewɓe yiɗirooɓe jawdi, worɓe ɓe toppitaaki galleeji mum en (ko naamnaa fof e galleeji mum en mbiya ngalaa, so njahii galeeji janani ko naamnaa fof itta totta (KAN)). Caggal ɗee ɗoon golle, jimɗi baɗɗi faayiida mbaɗaana heen e daande bani men debbo naalaŋke mawɗo e nder fedde Sifaa Hanki Pinal Hannde hono Faama Mbaay.
Caggal kiirɗeeli ɗi ɗiɗi pelle ɗee tati ɗee, Goomu ngatamaare e Sukaaɓe Kundel e Fedde Sifaa Hanki Pinal Hannde njuɓɓini, batu pattamulamu ngam wostondirde hakkilaaji e waɗde jokondiral hakkunde pelle ɗe tati mbele ene mbaawa gollodaade ko fayi arde. En ñaagiima Geno toowɗo o nde sellinta doole, hono ɗee golle nde mbaawata waɗde e kala sahaa mbele eɗen ɓamta pinal men e ɗemngal men (aamiin). Eɗen njetta musiɗɗo Jibi Aamel Sih nde waawi wallitde en haa mbaaw-ɗen waɗde ndee winndannde.
Nulaaɓe Fooyre Ɓamtaare
Jibi Aamel Sih e Abuu Kan, Nuwaadibu
