Kewu dowrowo e nder Fedde Ɓamtaare Pulaar e Muritani Gila Fooyre Ɓamtaare T° 31 feeñi, e ko adii ɗum nii feewde jooni, golle fedde nde fof kucciti ko e oo kewu dowrowo, hono Mawningol Hitaande 30 ɓere feddende. Ɗum yuɓɓinaama no haanirta nii e nder wuro Nuwaasoot, kam e nder wuro Nuwaadibu, e fawaade e no tuugnorgal golle ɗe lelniranoo nii.9eew Ciimtol Nuwaasoot, e Ciimtol Nuwaadibu.
Ñalnde 03 suwee 2006, to galle sukaaɓe keso ɗo e Nuwaasoot, Fedde Ɓamtaare Pulaar e Muritani, udditii ñalɗi mawningol hitaande capanɗe tata ɓere ko heptinaa. Hilifaaɓe heewɓe tawtoraama kewu o : hoyreeɓe teddungal Fedde nde, terɗe ARP/tabital Senegaal, cate fedde nde, nulaaɓe pelle pine ngenndiyankooje, terɗe fedde e yiɗɓe mum …
Bismaaɓe caggal leydi
Natal : Hoɓɓe Senegaalnaaɓe : Abdullaay Muktaar (hakkunde) e Defaa Mammadu ɓan e Sammba Hawoli Sek
Y.NG. heɓiino bismaade e kewu he pelle Pulaagu, to Senegaal, e to Mali, e to Burkina Faso, e to Farayse, e to Misra. Nde wonnoo ardiiɓe pelle nde tintinaa nde tawi ko ñoosiima, ɓe njaaɓtiima wonde ɓe keɓataa arde tawtoreede, kono ko kamɓe e fedde ndee ndenndi heen welemma, eɓe njetta heen denndaangal terɗe
F.Ɓ.P.M. (ɗum ko wonande Tabital Pulaagu Hakkunde Leyɗeele, Tabital Pulaagu Mali, Tabital Pulaagu Orop (Farayse). Dañi tawtoreede kewu oo tan ko Fedde Bamtoore Pulaar Senegaal/Tabital Pulaagu Senegaal, nde neldii ɗo sete mo terɗe tati : Abdullaay Muktaar ganndiraaɗo Jibi Njaay (Hooreejo sete), e Defaa Mammadu ɓan (Kalfinaaɗo Rewɓe) e Sammba Hawoli Sek (Kalfinaaɗo Pinal). Y.NG. ene rutta duwaawu e njettoor feewde e tawtoraaɓe ɓe, kam e ɓe ndañaani tawtoreede kewu oo.
