Konngol hooreejo e udditgol capanjoyaɓiire FƁPM
بِسْمِ اللَّهِ الرَّحْمَٰنِ الرَّحِيمِ
E innde Alla jurumdeere, jurmotooɗo.
Hade am jokkude, miɗo ñaagii nde nduwanto-ɗen denndanngal terɗe FƁPM e denndaangal ruttiiɓe to Joom men, kam e maayɓe juulɓe fof, nde Allah yurmotoo ɓe, yaafoo ɓe, haarna ɓe aljanna.
Avant de poursuivre, je vous prie de bien vouloir réciter la Fatiha pour le repos de l’âme des militants et sympathisants de l’ARPRIM qui nous ont quittés.
…. On njaaraama/Merci
Jaagorɗo Pinal e Ñeeñe e Kumpital e Jokkondiral e Parlemaa,
Terɗe Laamu e Juɓɓule Leydi,
Fiilaaɓe tedduɓe,
Bismaaɓe tedduɓe, haa arti e ummoriiɓe leyɗe goɗɗe
Terɗe FƁPM e yiɗɓe mum,
Musiɓɓe rewɓe e worɓe,
Miɗo yiɗi kadi ko adii fof, yettude hooreeɓe idinoove mi ardaade fedde ndee, sabu golle tiiɗɗe ɗe ɓe ngollii ɗee.
So ɗum yawtii, mbiyen tan sosnooɓe FƁPM e hitaande 1974, keewaano doole, keewano wallidiiɓe, kono aɓe njoginoo fiɓnde tiiɗnde, tee aɓe paamnoo no feewi « alaa leydi mbaawndi ɓamtaade tawi ine yeebii ɗemɗe mum e pine mum ».
Ɓe kawrii e oon sahaa e caɗeele keewɗe : laamu heɓtinaano jaŋde ɗemɗe ngenndiije. So yimɓe ine janngina ko maa cuuɗoo. Ɓe njanngintunoo ko he nder saloŋaaji maɓɓe, walla cuuɗi maɓɓe, ɓe mbinndata heen sahaaji ko he ɓale. Ɗee caɗeele fof e heewde, haɗaani ɓe jokkude darnde, sabu maɓɓe yenaneede nafoore soomiinde he jaŋde.
Alla rokki ɓe kadi wune law, sibu duuɓi 3 fat caggal nde laamu heɓtini fedde ndee, Leydi ndii ƴetti, e lewru kawle (octobre) 1979, pellital mawngal, so naatnude ɗe nder duɗe mum, ndi hunii kadi laawɗinoyde ɗe caggal ɗuum. Duɗal ɗemɗe ngenndiije sosaa ngam heblude ɗuum. FƁPM ine faarnorii jeyeede e sakkitɓe ndeen feere.
Caggal nde ndeen feere dartinaa e hitaande 1999, FƁPM darii duuɓi 40 ngam hirjinde e findinde, mbele ɗemɗe ngenndiije ine nduttoo nder duɗe laamu. Fedde ndee ine faarnorii kadi feere ƴettaande e hitaande 2022, ngam gartirgol ɗemɗe ɗee he ekkol, hay so tawii noon won ko ŋakki, haa teeŋti noon e laawɗingol ɗemɗe ngenndiije ɗee.
Duuɓi capanɗe joy hikka ko FƁPM darii e haɓaade humanbinnaagu ! Nder gure teeru e dowri, jannginooɓe yarlitiiɓe fedde ndee, njannginii ujune keewɗe yimɓe, haa mbaawi winndude e tarde e hiisaade. Ɗuum waylii nguurndam yoga e maɓɓe, udditani ɓe damal gannde e ndimaagu.
Law kadi, fedde ndee faami nafoore binndol, tokki ɗum himme mawɗo. Ɗuum addani nde sosde jaaynde Fooyre Ɓamtaare e hitaande 1980, ngam humpitde, jokkondirde terɗe mayre, sarde binndol e ganndal, e yahdude e kesam-hesaagu jooni nguu. Hannde, Fooyre Ɓamtaare woni jaaynde wajjere yaltoore he ɗemngal pulaar nder leydi ndii, ma a taw nii e nder diiwaan men oo no diidorinoo.
Kono hannde, goɗɗum, kesum, kimmuɗum jolii, potɗum daraneede : en naatanii yonta limrewal e ƴoƴre tafaande. Ina waɗɗii en kadi daraade mbele ɗemɗe men ine ngona ɗemɗe janngo.
Ɗuum ine jeyaa e golle kese ɗe Fedde ndee ummanii, rewrude e lowre enternet pulaar.org, so yollude caggitorɗe limrewe, binndanɗe jaŋde, celluka nanondiraaka, paabi ɗemɗiwi, e kuutorɗe keblirɗe naatgol pulaar he karalle kese.
Musiɓɓe rewɓe e worɓe,
Wonaa tan hanki men mo paarnorto-ɗen oo mawninten ɗoo hannde, ko ɓuri teeŋtude, ngon-ɗen ko e heblande ɗemɗe men no kisiri janngo. Alaa e sago ko gollanoo koo hisnee, tiiɗtinee. Kono kadi, yontannde aroore ine foti daranaade ƴellitde ɗemɗe men haa ɗe njahda e kuutorɗe hannde.
Eɗen nduwii nde duuɓi 50 paaɗi ngaddanta ɗemɗe men ngenndiije heɓde geɗal mum en timmungal nder jaŋde leydi ndii, nder njuɓɓudi laamu leydi ndii, nder jaaynirɗe leydi ndii, nder pinal leydi ndii, e nder tageefo limrewal.
Yo Wuur FƁPM !
Yo wuur Muritani keewal e coccondiral pine ! On njaaraama !
