Fedde Ɓamtaare Pulaar catal Nuwaadibu ina aadorii waɗde « juul mo wuuri » e kala juulde. Hikka catal ngal yuɓɓini ko hiirde juul mo wuuri e tawtoreede yoga e terɗe catal ngal ñalnde aaɓnde 23 seeɗto 2026 ɗo Galle Pulaar Nuwaadibu, jooɗorde catal ngal, gila waktu 17 haa waktu 21. Faayiida hiirde ndee ko wuurtinde fuutankaagal e pulaagu.
Yimɓe ɓee nootitiima e keewal kadi mbaɗdi juul mo wuuri no haanirta nii, njarlondiri, njaafondirii ko suuɗii e ko feeñi. Terɗe yiilirde ndee kala e terɗe bellelle catal ngal kala ina tawtoraa. Ina jeyaa e fayndaare hiirde ndee siftinde yimɓe ɓee kuccam fedde ndee e catal ngal. Geɗe keewɗe kaalaama heen, ko wayi no :
– tiiɗnaade e ɗemngal ngal e pinal ngal haa teeŋti e janngude ɗemngal ngal ;
– anndinde yimɓe ɓee wonde laamu nguu udditii duɗe kese wonande demɗe ngenndiije ɗee kala, kadi duɗal pulaar rogere 1 udditaama hikka he Nuwaadibu to ekkol 8. En ndañii fotde almuuɓe noogaas pawɗo, kono ina yiɗanoo ko ɓuri ɗuum.
– lohre catal ngal haalaama toon, sabu terɗe keewɗe nattii arde batuuji saka fiyde piye lewru, wonde nawrata fedde yeeso ko piye lewru e renndude miijo ;
Ko wonaa ɗuum, njarameeje mbaɗaama heen, kadi yeewtaama, fijaama, jalaam… Ko weltaare tan heɓaa heen…
Nuwaadibu ñalnde 23/03/2026
Muusaa Bah, hooreejo catal
