Doktoor Muhammadu Faalil Sih ƴettaama duɗal jaaɓi haaɗtirde biyateengal Imperial College London, toon to Aangalteer. O gollodtoo toon ko e hiisiweejo mawɗo, gooto e ɗowooɓe oon fannu ganndal e nder aduna hee, hono Martin Hairer.
Martin Hairer heɓiino Galaŋ Fields (tolno njeenaari Nobel) e hitaande 2014, e ndee-ɗoo hitaande 2021 ko kanko heɓi njeenaari mawndi mbiyateendi Breakthrough Prize, kadi omo jeyaa e dental dowrowal annduɓe Angalteer biyateengal Royal Society. Martin Hairer e Muhammadu Faalil Sih ina ndoori wiɗtooji keewɗi loowɗi gaggaaji hiisa keelnuɗi, caɗtirɗi annduɓe gila ko ɓooyi. Heen gaggaaji ina njogii siyno fattamlamo e nder ɓalliwal kiɓɓiwal (Physique quantique), hono ko wiyatee miijanteeri gese kiɓɓiwe. Imperial College London ina jeyaa e duɗe dowrowe ɓurɗe darjude e aduna hee, ende moofti Galaŋeeɓe Fields tato e heɓɓe njeenaari Nobel sappo e nayo, ko jiydaa e njeenaaje goɗɗe.
Maa Fooyre artanoy on heen so Alla jaɓi.
Tesko : Ko sabu makko wonnoode e eggude haɗi mo waawde huuɓnude winndannde nde o heewnoo yaltinande oo, hono “Hakkille njeerteejo”. Ɗum noon janngooɓe Fooyre fof njaafnaama, haa tonngoode faande, so Alla jaɓii.
