Hooreeɓe pelle pinal tati ɗee njooɗodiima ñalnde altine 19/04/2021 e Hooreejo HAPA. O holliitii ɓe geɗe garooje ɗee:
– Golle Hapa : wonaa tan reende yo jaayɗe ɗee ndew laabi taƴanaa ɗii, kono kadi ko waɗde feere mbele eddaaji pine e ɗemɗe fof ine teskee e kala ko ine gollee. E nder ɗuum o wiyi o fuɗɗorii ko HAPA : o ƴettii gollotooɓe e ardorde HAPA hee yimɓe jeyaaɓe e leƴƴi ceertuɗi haa nokku oo jogoo mbaadi leydi ndii. O wiyi laamu ine foti waɗtude hakkille e ɗumɗoo e kala ko ine golla.
- Hapa ine felliti naatnude ɗemɗe ngenndiije Pulaar e Sooninke e Wolof e nder kawgel mbaɗatnongel hitaande kala he Arab e Farayse, paatungel e ɓuraa moƴƴude winndannde. Kala gardiiɗo rokkee njeenaari. Ɗum noon hikka maa binndanɗe e nder ɗemɗe ngenndiije ndokke njeenaari.
- Maa Hapa yuɓɓin heblo jaaynooɓe he nder ɗemɗe ngenndiije ɗee hono no waɗiraa he Arab e Farayse nii.
Wonande ɗee toɓɓe ɗiɗi cakkitiiɗe, o ɗaɓɓii e pelle pinal ɗee nde ndokkata mo miijo mum en e no geɗe ɗee potata yuɓɓinireede.
Nde o joofni, hooreeɓe pelle pinal ɗee njettii mo e feere moƴƴere nde o ƴetti ndee, kolliti kadi heɓaare pelle ɗee ngam wallitde kala ko ine ɓamta ɗemɗe ɗee. Ɓe kollii mo caɗeele ɗemɗe ngenndiije ɗee he nder jaaynirɗe laamu ɗee : tele e rajo ngenndi oo. Kono ɓe mbaawaani yaajnaade heen sibu ɓe keblanaaki ɗum tawo. O ɗaɓɓii nde pelle ɗee cakkita mo miijo ko faati heen. Ɓe ndokkii mo dallinannde pelle ɗee faatunde he ɗemɗe ngenndiije ɗee.
Hade ɗuum pelle pinal ɗee tawtoranooma gollordu HAPA juɓɓinnoo ngam artirde njeñtudi wiɗto yuɓɓinnoo ko faati e teskagol eddaaji (diɓersité) nder jaayɗe nan-yiyngo.
Wiɗto ngoo hollitii ɓurondiral mawngal hakkunde Arab e Farayse kam e ɗemɗe ngenndiije keddiiɗe ɗee, yeru, ɓe tawii so ɗemɗe Wolof e Sooninke e Pulaar ɗee fof ndentii, geɗal majje e bannge dokkirgol kabaruuji, ɗe njogii tan ko joyaɓal e mudda oo (20%).
