Ndiyam toɓii e diiwanuuji ɓadiiɗi en ɗii fof. Huɗo fuɗii haa heɓii to wayrunoo heɓde. He ko kumpiti-ɗen ɗiiɗoo diiwanuuji fof toɓaama haa heewi, kadi fuɗii huɗo haa wayno no wayatnoo. Diiwaan Eeleega e diiwaan Kayhayɗi e diiwaan Sehilbaabi e diiwaan Kiifa. Joomiraaɗo jom baɗe e baawɗe oo jippinii ndiyam keewɗam, o fuɗnii e leydi makko he huɗo heewko sabu muumanteeji ndaña nguura, yimɓe naftoroo.
Aadee en noon ina luɓaa hakkillaaji e peeje ngam naftoraade tagooje Allah. E dow ɗuum en njiyii laamɗo ina laamii leydi fof ina hisna leydi fof. Konngol laamɗo ina hujjitina leydi fof jaɓee ɗooftee waɗee. Kono ɗamaawu ndiyam njippiɗam e leydi ndii e kooɗoo huɗo fuɗko e leydi ndi i, ko joomiraaɗo joom baɗe e baawɗe oo gooto waawi nii waɗde …
E dow ɗuum kadi o loowi e aadee en hakillaaji yo naftoro baɗe makko. Jooni noon en ndañii, heddii ko ƴeewen no hisiri haa naftoro-ɗen. Feere adannde ko hisnude e bone jeynge. So woodii ko ɓoccitii ñifee law, caggal nde waɗaa laabi kallatooɗi cumu. Eɗen teskii hikka ɗo huɗo ko tolnii toowde e sukkude, so jeynge jappilii heen, ɗum kallu waawaa haɗde ɓennude.
Miijo men ko eɗen kaandi e otooji ñifooji jeynge sabu oto ɓuri yaawde paabagol. Laddeeji ɗii no mbay sukkude nih jeynge ina waawi ñaamde ko heewi, nde tawnoo joom nduroori en koɗata ko ladde, etee jeynge ko koɗdiiɗo janfotooɗo, kadi kala ɗo jeynge ɓoccitii adotoo nootaade toon fof ko henndu. Ɗum noon alaa majjuɗo no wayata.
Muusaa Mammadu Bah lollirɗo Coftuɗo Bah to Jeybaaba Wuro Dooro
