To Amerik, ɗii lebbi jawtuɗi fof, partiiji ɗiɗi ɓurɗi mawnude ɗii ngonnoo ko e suɓaade hol jogorɗo wonde kanndidaa mum en e woote gardagol leydi ndii jogorɗe yuɓɓineede ñalnde 8 noowammbar 2016. Wonande parti Demokaraat, suɓaa yo won kanndidaa ko Hillary Clinton, cuddiiɗo Bill Clinton, gardinooɗo leydi ndii hakkunde saawiyee 1993 e saawiyee 2001. Hay huunde bettaani. Wonande parti Rippoobilikeejo oo, suɓaa (ñalnde 19/07/2016) ko biyeteeɗo Donald Trump, jahroowo e duuɓi 70, mo innde mum fuɗɗii lollirde haalaluuji ngañgu ɓutti.
Toɗɗegol makko e ɗuum, ko huunde hulɓiniinde. Hulɓiniinde wonande Amerik, sabu haalaluuji makko ngañgu ɓurtuɗi, kulɓiniiɗi wonannde winndere ndee, so neɗɗo ciforiiɗo nii ardiima leydi ɓurndi doolnude e winndere ndee. Kanko ooɗoo wiynoo so o heɓii laamu, hay juulɗo gooto wonataa e Amerik, ma o yaltin ɓe toon kamɓe fof. So o heɓii laamu, hay Amerik worgonaajo gooto wontaa naat leydi ndii, sibu o jogori mahde ko ɓalal toowngal hakkunde leydi ndii e Meksik, ɗo ɓeen uujooɓe keewi naatirde Dental Dowlaaji Amerik ummoraade Meksik e leyɗe Amerik worgo goɗɗe.
Bookara Aamadu Bah
