MBaadi Tagofeere Leydi : Tagofeere men, hono Leydi, ina murliɗi. Nde wonnoo koɗ-ɗen ko e dingiral bertingal, yimɓe heewɓe cikkata ko Leydi ko ko wertii.
Ɗee geɗe nay (4) garooje ene kollita en wonde Leydi ene murliɗi :
- Hoɗnooɓe e leydi Geres (hono Gerek en), e leyɗe goɗɗe, ngadii fof humpitaade wonde Leydi ene murliɗi, ko ene wona hannde duuɓi ujunnaaji ɗiɗi pawɗi (2 000). E maayirde teeminannde sappo e jeegoɓiire (16ème siècle). Portugeesnaajo gooto, biyeteeɗo Magellan ɗannii, ngam taartaade Leydi. O waɗi duuɓi tati e ɗanngal makko, e geec, tuggi 1 519 haa1 521, o arti ɗo o ummorinoo ɗoo, ɗum seedtinani yimɓe wonde Leydi ene murliɗi.
- Tuggi ɗanngal Magellan feewde jooni (2 007) wonii duuɓi 486. Denndaangal jolnooɓe e jowitiiɗe (satellites), mbeeyi e dow weeyo Leydi (hono Yuri Gagarin to leydi Riisi, gadiiɗo waɗde ɗum), walla Fiisee Apollo 2 (mo leydi Amerik, jahnooɗo to Lewru, e hitaande 1969), e fotooje maa nate keɓaaɗe heen kollitii murliɗgol Leydi.
- Wiiwaano : so en ŋabbii e kiw walla caali, maa huɓeere, taakaw, walla kadi so en keɓii e dingiral, walla e kolangal, en mberliima gite men banngeeji kala, haa to jiyle men mbaawi haaɗde, ɗum wayata en ko no leydi e asamaan (kammu) ene pottita nii. Ɗo Leydi e asamaan pottitta ɗoo wiyetee ko wiiwaano : »diidol » ngol ko murlol, ngol maandinta ko murliɗgol Leydi.
- Ɓeto dingiral Leydi : Dingira l Leydi ɓetata ko teemedde joy e sappo (510) miliyoŋ kilomeeteer kaaree (510 miliyoŋ km2) : fotde 70 % dingiral ngal (360 M km2) ko ndiyam (geec), 30 % keddiiɗi ɗi (fotde 150 MKm2) ko leydi njoorndi.
- Taarol Leydi (hono diidol taarotoongol dingiral Leydi), njuuteendi mum ɓetata ko ujunnaaji capanɗe nay (40 000) kilomeeteer. Njuuteendi Hakkundeewol mbeɗu Leydi (diamètre) ɓetata ko ujunnaaji sappo e ɗiɗi e teemedde jeeɗiɗi e capanɗe joy e jeegom (12 756) kilomeeteer ; Feccere hakkundeewol ngol ko 6 378 km.
Pecce Leydi : Tagofeere Leydi ina murliɗi no fuku nii, no oraas nii : ko ɗum tagi eɗen innira ɗum « FUKU LEYDI ». Annduɓe koode miijiima, etee nanondirii e diidol gootol dewowol hakkunde Leydi, tawa engol fecca Leydi e pecce ɗiɗi potɗe : ngool diidol wiyetee ko ŊOROL PECCOL (Equateur).
Pecce ɗiɗi ɗe ne mbiyetee ko Feccere Fuku Dow (hono « Hémisphère Nord »), e Feccere Fuku Les (hono « Hémisphère Sud) :
Feccere Fuku Dow : ko Feccere Fuku Leydi wonnde Dow diidol ŋorol Peccol ngol (woni Rewo /Saahal) ; Feccere Fuku Les : ko feccere Fuku Leydi wonnde Les diidol ŋorol Peccol ngol (woni ɓorgo /Ɓaleeri).
Aamadu Umaar Jah
