Hono no mbiyruno-ɗen e FƁ 39, eɗen ngarta ɗo e golle hiirdecatal ngal ñande alet 4/2/07. Aamadu Jibeeri Sih (Cukko Kalfinaaɗo Pinal ƴ.NG.) e Mammadu Maamuudu Baal (Cukko Kalfinaaɗo Kumpital ƴ.NG., nelaaɗo Fooyre Ɓamtaare) nootiima e hiirde nde e innde Fedde e noddaandu Catal El Minaa (Leegal 6ɓal wuro Nuwaasoot), e tawtoreede almuuɓe duɗe mum janngooɓe to ñiiɓirde maɓɓe anndiraande Duɗal Suleymaani Kan. Winndii e duɗal he ko almuuɓe 43 : heen 6 ko rewɓe ; ñiiɓi heen ko 27.
E ngaal pottital, ari heen ko terɗe catal ngal e yiilirde catal, e almuuɓe tolnooji ɗiɗi janngooji ɗoon ɗi (tolno gadano e fannuuji), kam e jannginooɓe mum en , e huufɓe golle ɗe, e wallidiiɓe maɓɓe fof ngarii e keewal kam e peewal, hono no ngaadorinoo waɗde e kala sahaa nii ; Ko rewɓe e worɓe, e mawɓe e sukaaɓe leegal ngal fof ngari ina ñaantii no haanirta nii. Udditi golle ɗe ko Musiɗɗo Abdarahmaani Siisee (Ceerno Siisee).
Caggal yettere Alla e nelaaɗo mum Muhammadu (S/AS), o bismii hoɓɓeɓe, e terɗe catal ngal, e denndaangal tawtoraaɓe kewu o. O teeŋtini njettoor FƁPM feewde e musiɗɗo Aadama Konte, e joom suudu mum Sala Haydara, e ɓesngu mum, sabu darnde mum en e golle ɗe, e ballal mum en haa duɗe ɗe mbatti janngude jamma.
O yettii kadi Musiɗɗo Sammba Mbaay, jeyɗo nokku o, gittuɗo coktirɗe duɗal mum waɗi ɗe e juuɗe catal ngal, mbele ene huutoroo kala nde sokli, ko aldaa e njoɓdi,ɗum fof sabu hoolaare mum e fedde nde. Nde o joofni, o hokki konngol Koolaaɗo Kuuɓal Duɗal ngal, oon ne holliti yimɓe ɓe njuɓɓudi catal ngal e duɗal ngal. Caggal ɗuum, refti heen ko mogo keewɗo faayida, jalniiɗo, peewtuɗoe nehdi suka bewnaaɗo e nder galle : alaa fof mo o huli walla mo o hersi, o toppitii tan ko gorbi e jarli ; o nawaa to ceerno, o watti ko yeddude ɗum, e foomnaade ɗum e fukkude ɗum e leydi… ƴimɓe fof njali,paami wonde suka nehirtaake »yah, ma artu e ma ! »; ko e galle fof waɗatee nde ɗigga e duɗal, e renndo. Piyɗo ceerno, oon mbele ma o dursu ? (naamndal ceerno Siisee). Alaa ! (jaabawol yimɓe fof).
Caggal ɗum nulaaɓe ƴ.NG. tottaa konngol. 7een ne njetti almuuɓe ɓe e darnde mum en maantinnde e janngude pulaar e ɓamtude pinal mum en. 7e njetti catal ngal, ɓe kolliti faandaare FƁPM, e yaakaare mawnde nde fedde nde njogii e maɓɓe, sabu teskaade ko ɓe sukaaɓe rewɓe e worɓe softuɓe. 7e mbasiyii ɓe yo ɓe tiiɗno, ɓe njokka golle paayoɗinɗe ɗe ɓe ngoni e dow mum en ɗe. Nde ɓe njoofni, ko Soknaajo Sala Haydara hokkaa konngol : o siftini wonde jaŋde pulaar e Moritani ko huunde ɓooynde e nokku he, etee ina heewi faayiida ; o wasiyii yo golle ɗee njokke.
Caggal ɗum Sokna Jeynaba Sek ne seedtiima golle ɗuɗal ngal, e faayiida mo ngal jogii e leegal he. Caggal ɗum ko yimɓe duɗal ngal ndokkaa konngol : Abdul Jibiriiru Jallo (kalfinaaɗo Pinal duɗal ngal), Muusaa ƴero Lih (kalfinaaɗo jokkondiral e jeeyngal), Aamadu Paate ɓele (Kalfinaaɗo jaŋde). E nder konnguɗi maɓɓe feeñi heen ko : njettoor feewde e tawtoraaɓe ɓe fof ; hirjino yimɓe ɓe e eeraade ɓe yo ɓe tiiɗno e pinal ngal, ɓetoppitoo ngal ; wasiya feewde e sukaaɓe rewɓe ɓe, yo ɓe ɓoornoto comci timmuɗi e kala sahaa, haa teeŋti e duɗal ngal ; muñal hakkunde almuuɓe ɓe e koye mum en, e yo ɓe yo ndaro, ɓe toppitoo jaŋde nde no haanirta nii, ɓe njokkondira e jannguɓe e alɗuɓe, kam e yontaaɓe leñol ngol, mbele ina ngadda balle mum en e golle leñol ngol, ekon. Usmaan Mammadu Jallo (kalfinaaɗo ngalu) waɗii yimre jaaroore mawɓe dariiɓe haa jooni e fedde ɓamtaare pulaar ina towa sukaaɓe leñol ngol. O noddii yo yimɓe ndentu, njuɓɓa, njogoo doole, mbaawa firtude huunde, mbaawa wonde ko nafata, toppitoo jaŋde. O ɗaɓɓii e yiilirde nde tuugnorde paatuɗe e fannuuji jaŋde, hono cellal, e hiisa, ekon. Ko ɗo Musiɗɗo Siisee yowi pottital ngal.
Hoɓɓe ɓe nduusaa, caggal nde kottiraa palatuuji keewɗi beñe, kam e tufam mbelɗam sanne. Ñalɗi jaŋde e pinal Catal Mina ko nii ciforii : Alet e Alarba (Jaŋde Rogere 1), Aset e Talaata (Jaŋde Rogere 2) ; Alkamiisa ( Hiirde Pinal), ñande heen fof ko waktuuji 9 haa waktuuji 11 jamma. Mammadu M. Baal e Aamadu Jibeeri Sih (F.7. ene ɗaɓɓi e terɗe catal El Mina nde toppittoo cargol jaaynirgol fedde nde, e nder leegal he, no haanirta nii.)
