Karte Fedde Ñande 29/04/2007, denndaangal terɗe maa karte fedde nde ko ujunere e teemedde jeegom e capanɗe jeeɗiɗi e jeetati (1678), wonande cate 16 FƁPM ɗe : Nuwaasoot (Daar Nayiim, Arafaat, Riyaad, El Mina, Sebka, Liksaar), Nuwaadibu, Suwoyraat, Rooso, Kayhayɗi, Likseyba (Gorgol), Jowol, Jinkeere (sara Faraa Liitaama, to falnde Magaama), Sehilibaabi, Kiifa, Gaar Sammba (diiwaan Asaba, Kiifa). Koppe Fedde Koppe fedde ɗe (e nder laamorgo he tan tawo) ummanaama ko ɓooyi, kono geɗe keewɗe leeltinii ɗum : mawningol hitaande 30ɓere FƁPM, ŋakkeende jeeyngal e rewindo e nder cate Nuwaasoot, ekn.
E oo sahaa, ƴiilirde Ngenndiire e Goomu Ngalu e Eɓɓooji Faggudu ma njuɓɓin njilluuji e nder cate ɗe, mbele golle koppe ɗe ene njoofa no haanirta nii.
Rooso : Jonnde huuɓtidinnde terɗe fedde nde yuɓɓinaama ñande alet 22 abiril 2007 to Duɗal laamu leegal Demal Dik. Tawtoraama heen yimɓe 28 : terɗe fedde nde haa teeŋti e arɓe winndaade e duɗe catal ngal. Ɗee duɗe ngudditaama : Ñande 24/04/2007 : Tolno 3, hono Duɗal Toowngal maa Keblorgal jannginooɓe, jannginta ngal ko Ceerno Abdullaay Demmba Ñaŋ (Porofesoor to Liisee Rooso) ; Ñande alet 29/04/07 : Tolno 1, ko fuɗɗotooɓe, ɓuri heewde heen ko rewɓe, ko worɓe tato tan ngoni heen, jannginta ngal ko Ceerno Aamadu Taal (Cukko Hooreejo Catal ; caggal alet 6 mee 2007, Tolno 2 : ko meeɗnooɓe janngude pulaar, ene njiɗi ɓeydude jaŋde mum en : ngal fuɗɗotoo ko caggal nde tolno almuuɓe ɓee ɓetaa ñande heen.
Muhammed Lemin Sih, hooreejo Catal , Tel : 694 23 31
