Jiytaaɗo o wiyetee ko Aliw Soh, ko o ɓiy Muusaa Dem ɓooyi e Maari Sam Baalel. Ɓe njeyaa ko Beelel Uurngel, e falnde Baabaaɓe (hakkunde Ɓoggee e Baabaaɓe, e diiwaan Barakna); o jibinaa ko e hitaande 1988, ɗo e Nuwaasoot. Nde omajjata nde, omo yahdunoo e banndiiko, hono cukalel goɗngel ene hecci mo lebbi jeegom (6). Oon noon artaani haa jooni, o wiyetenoo ko Alasan Jallo. Aliw Soh, e wiyde mum, o ummii ko hedde Irkiis, e wuro ina wiyee Barayna (e diiwaan Rooso), o yantoyi ko Eeleega. Sanndarmaaɓe mbaɗimo e juuɗe debbo hardaane.
E nder heen, hardaane o ko jeeyoowo to jehre to. No Alla waɗata peeñɗi tan haa banndiraaɗo debbo ina wiyee Mayram Demmbel heɓtiniri mo kaaw makko, ina wiyee Saada Jah. Mayram nuli e koreeji makko. Ɓeen ngari Eeleega, njiyi mo, keɓtini mo, etee kala maale ɗe ɓe kaali, ɗeɓe keɓtiniri mo, ina e makko. Ndeen koreeji ɗi mbaalii haa weeti, ɓe njaahdi e makko to komiseeriyaa mo Eeleega. Ɗoon poliseeji ɗi ɗesi teppude haala ka, sabu e wiyde suka o, gooto e maɓɓe fiyii mo hello sabu omo wiya Fulɓe ko koreeji makko, mbele omo wiya safalɓe ko koreeji makko. To komiseeriya Eelega, ɓe keɓii wiyde wonde won nodduɗo e telefon to Peekaa, wiyi suka o ko ɓiyi mum en. Haa jooni, oo telefoŋ mo ɓe mbiy oo, joom mum en ngaraani haa jooni : kaalanɗo en haala kaa, hono Aamadu Abuu Jallo ganndiraaɗo Cukko (to Arafat), e wiyde mum, nde o naati to komiseeriyaa Arafaat nde, o heɓii haaldude e suka gartuɗo o, oon wiyi mo ko ɓulaadu Biyeeri en, to Peekaa.
E sikke makko, ko poliseeji ɗi mbiyi mo, yo o wiy noon. Ko heddii ko, kala jiɗɗo laaɓeede haa laaɓa, yo jokkondir e makko (Tel: 675 05 43 walla 656 38 92).
Aamadu Jibeeri Sih
