Maamuudu Haaruuna Joop «Yo Pulaar lomtano en Farayse heɓtoo Engele»
Ɓesngu Muritani teeŋti noon e sukaaɓe mum mooɓnoo e joofnirde kitaale capanɗe jeegom (60). Ndeen jeytaare e fannu mum pinal ɗaɓɓunoo ko nde ɗemɗe ngenndiije ngonata ngooroondi tippudi nehdi e jaŋde e nder leydi he etee tammboo ƴellitaare leydi ndi. Ko ɗum addani Fedde Ɓamtaare Pulaar e Muritani soseede e hitaande 1976, ñande 7 marse, to galle Sileymaani Kan. Mbeɗe tawtoraa e oon kikiiɗe wondude e sagataaɓe maa ngabbo e yimɓe noogaas ina nguuri haa e oo ñalawma hannde, ko wayi no : Mansuur Caam en, Haasamiyyu Sih en, Njawaar Kan en, ƴaayaa Mammadu Bah, Jibi Hammee Lih, Sileymaani Kan, Mammadu Siley Bah e woɗɓe ɓe en limtaani…
Ko goonga jeeyngal mawngal waɗaama e daawal hakkunde 1976 e 1980 haa addani Fedde nde anndeede e jookli ɗii kala e nder leydi haa e caggal mayri, kono ƴellitaare mayre tigi rigi fuɗɗii ko caggal Batu mooWondiral njuɓɓinanoongu e lewru abriil 1980. Ko ndeen golle mayre mbaɗi ñamri tigi rigi : jaŋde ƴellitii e fannuuji kala, jeewte pindinooje e peeñcu, e to rajo e jaaynde winndaande. Ina moƴƴi mi teeŋtina ɗo peeñgol e oon dumunna Fooyre Ɓamtaare e tonngoode mum adannde sabu ko e ngal daawal ooɗoo fannu ummanaa, Fooyre Ɓamtaare huɓɓi etee haa e oo ñalawma ñifaani etee ina jeyaa e ko saabii ɗum sagataaɓe heewɓe sosnooɓe e fuɗɗoode Goomu jaaynde teeŋti noon e Bookara Aamadu Bah mo nganndu-ɗaa haa e oo ñalawma ko kañum jogii karallaagal jaaynde nde haa e mbaadi mum kesiri ndi. Ƴellitaare ɗemngal fawii ko e ɓiɓɓe mum sabu ko heewi hannde gollaama e ɗemngal he sabu fanniyankooɓe leñol ngol fof ina pula gannde keewɗe e ɗemngal he ko wayi no : sariyaaji, ko yowitii e cellal yeru SIDA, karallaagal, wiɗtooji ekn …
Koddiren haa hannde ko waɗaa ko e heewde ko fuɗɗoode tan, eɗen poti ɓeydude coftal e golle, paggo-ɗen doole kese, doole sukaaɓe mbele eɗum ɓeyda ƴellitaare ɗemngal ngal e nder leydi he e nder winndere nde kala.”
