Suleymaani Baal ƴefti konngol, o wiyi : » Onon banndiraaɓe am, onon yiɗɓe am, Fuutankooɓe, gooto e mon fof yo heɗto hattee ! Mbeɗe haala, ko kaalat-mi ko, eto ɗon ɗum faamde, so on paamii mbele maa naftu en ! En tohii, en lorlii, gooto fof ko dimo Alla, e daande mum ! Deeniyankooɓe nana ngardii en, ina piya, ina tonnga, ina ñallina e naange. Nay maɓɓe njooɗotaako, beyi maɓɓe njooɗotaako, baali maɓɓe njooɗotaako ! Alla jey ma, kamɓe ne ɓe mbaɗtan ma heen goɗɗum. So ɓe tinii joom suudu maa ina sinkii, ina yooɗi, ɓe mbiya a haandaani heen, a fotaani dañde ooɗoo debbo, ɓe nawa mo galle maɓɓe. Ɓe tawa ndimaangu maa ko njarlu mbaawtungu, tawa ko njarlu ɓasaangu, walla tawa ko ndimaangu puuɗaangu, ɓe ƴetta, ɓe paana galle maɓɓe, ɓe mbiya aan a haandaani jogaade nguu ndimaangu. Kala ko moƴƴi, ko e koye maɓɓe ɓe kaandini. Etee kala ko ɓe mbaawi waɗde ma ne tan, mbiyataa tan ko yo Alla ñaaw, alaa fof ɗo ngullitto-ɗaa, mbiyataa tan ko yo Alla ñaaw, alaa mo kalmota-ɗaa ! Eɗen njiyaɗeen mette, Hormankooɓe nana keedti dow, hitaande fof eɓe ngara, eɓe naamnoo en muudo Horma, so toɓii, so toɓaani, so ilii, so ilaani, ko ɓe arooɓe tan. « Sakkaat » jeyi ɗum ko miskineeɓe, kamɓe ɓe ngonaa miskineeɓe. Ɗum noon pelliten ! Pelliten kaɓe ɗen, taƴen ɓoggi e daaɗe men ! Neɗɗo maayata tan ko laawol gootol ! Etee so en maayii, Alla jaggirtaa en ɗum. Etee, eɗen njogii doole ko eɗen kaptoroo ɓe. » Ɓe mbiyi :
- « Hol ɗeen doole ? »
- » Innde Alla… Oɗon njawi ɗuum ? »
- Ɓe mbiyi mo : Alaa ! » Oon sahaa, nde tawnoo Deeniyankooɓe ina ngardii, ina cañii, ɓe mbiyi mo :
- « Sheex » Suleymaani Baal, amin njaɓa, kono e geɗel noon, so tawii min ndañii damal, ko aan laamotoo ! »
- « Onon ɓe njanngiɗ-mi ɓe, to Duɗal Piir Sañukuur, hoto njejjitee « sirru » mo Ceerno men Seriñ « 9aal » Amar Faal haalannoo gooto e men fof ! O wiyiino mi, ma mi tampan diine, kono mi laamotaako ! »
- Ɓe mbiyi mo : « Ko goonga, ɗum noon min njaɓii ! » E oon sahaa aadiyankaagal ene woodi, ndimaagu ina heddii ! Heen gooto fof garɗo, won heɗdiiɓe caggal mum, nde o hooti, o yiindiri e ɓeen, ɓe nanondiri. Ɓe idii fof ko ƴeftude laawol, eɓe ƴeewoya Satigi Suley Njaay Mawɗo (laamɗo Deeniyankooɓe e oon sahaa).
Aamadu Umaar Jah
