Ko fedde nde wonaa laamuyankoore toppitiinde wallude ɓesngu Nuwaadibu to fannu cellal, jaŋde haa teeŋti noon e jokkondiral hakkunde ɓiɓɓe Nuwaadibu e ɓiɓɓe kanari (canaries) to Espaañ. Ardii fedde nde ko Pino Gonzalez. Nuwaadibu e Kanari ko gure ɗiɗi jokkondirɗe tawii ko fedde nde saabii ɗum sabu e hitaande 2006, fedde nde nawiino jannginooɓe 4 e almuuɓe 4 (élèves) to Espaañ e nokku ina wiyee Kanari, ɓe mbaɗii toon yontere. Faayiida njillu maɓɓe ko hollirde pine leydi men e waɗde jokkondiral gure ɗee ɗiɗi.E njillu maɓɓe, ɓe mbaawii heɓde toon kaɓirɗe keewɗe naftooje duɗe janngirɗe sukaaɓe men (écoles), ɓe mbaawii jokkondirde e anndondirde e pelle goɗɗe.Ɗuum ko seeɗa e golle fedde nde, sabu ɓe ceeraani e mahde duɗe janngirɗe sukaaɓe e cafrirɗe e wallitde to bannge safaara ekn…
E ooɗoo sahaa ngam yiɗde jokkondiral ngal yoo yahru yeeso, fedde nde seeraani e yuɓɓinde jonte gostondiral miijooji ko fayti e cellal,laaɓal,jaŋde e yuurnitaade ngoƴaaƴi naftooji taariindi (environnement) e wostondirde miijooji ngam hollondirde pine. E nder ɗuum, njillu kesu waɗii,ngol ɗoo ko jannginooɓe sappo e ɗiɗo ngummii Espaañ, ko ina tolno e 60 jannginoowo wuro Nuwaadibu tawtoraama ñalɗi ɗiɗi ɗi ɓe njuɓɓini ñalde 03 e 04/06/07 to nokku maɓɓe (coopération Espagnole) e dow gardagol Ana Baruos e ballondiral David Curtelin) ngam waɗde jokkondiral hakkunde hoɗɓe ɓe e jannginooɓe wuro Nuwaadibu mbele ina mbaawa anndondirde e gollondirde. E nder ñalɗi ɗi ko tiiɗi gollaama heen sabu caggal tiitooɗe jeewte ɗe ɓe kolliti yeewtaama huunde e majje; ɓe mbaawi kadi hollitde deftere nde ɓe muuli e ballondiral huunde e jannginaaɓe wuro ngo haa teeŋti noo e musiɗɗo Bah Bookar Gata, ngam yiɗde loowdi deftere nde yoo wattu janngineede e duɗe janngirɗe wuro Nuwaadibu. Loowdi deftere nde ko jannginde sukaaɓe no potata reentoraade won e rafiiji ɗi ndiyam heewi won’de sabaabu,e geɗe paytuɗe e pinal ekn…Ɗuum fuɗɗotoo ko lewru oktoobar 2007.Caggal ɗuum ina jogori waɗde koolol loowdi deftere nde e geɗe goɗɗe e lewru mee 2008.
Kan Aamadu Nuwaadibu
