Pelle pine ngenndiyankooje, fedde Ɓamtaare Pulaar, e fedde Ɓamtaare Sooninke, e fedde Ɓamtaare ɓolof e nder Muritani njooɗodiima ñalnde aset 10 et alet 11 noowammbar 2007, ngam waɗde seedantaagal jaŋde ɗemɗe ngenndiije Pulaar, Sooninke e ɓolof nder leydi ndi, e daɗɗude miijooji kuccam ndeen jaŋde. Ina jeyaa e paandaale ɗiin ñalɗi, heblanaade Diisnondiral ngenndiyankeewal jogorngal waɗde e leydi he, e nder ndeeɗoo hitaande jaŋde 2007-2008, peewtungal e tippundi nehdi e jaŋde leydi ndi. Haralleeɓe heewɓe ina njeyaa e hebluɓe ñalɗi ɗi. Jonnde adannde nde waɗi ko ñande alet 7 oktooburu 2007 to wonnoo jooɗorde Duɗal Ɗemɗe Ngenndiije (D.Ɗ.NG.).
Fotde 30 neɗɗo e bismanooɓe e golle he tawtoraama jonnde nde. Ɓe ndokkondirii aadii ñalnde altine 3 desammbar ngam renndinnde ciimti goomuuji golle tati peccitinooɗi golle ɗe : goomu nehdi e jaŋde, goomu jaŋde mawɓe, goomu wiɗto. Caggal ɗum ɓe kuccani heblude miijo huptodinngo fotoowo holliteede denngaagal haralleeɓe e jagge leƴƴi ɗi. Ma en ngatoy heen e tonngoode men 49 so Alla jaɓii.
