Umaar Saydu, ɓurɗo anndireede hannde Sayko Umaar, walla Al hajji Umaar Al Fuutiyyu, jibinaa ko e wuro Halwaar, sara Podoor, e hitaande 1797. Baaba makko wiyetee ko Ceerno Saydu Usmaan, o yettetee ko Taal. Yumma makko wiyetee ko Aadama Ayse. Umaar Saydu wonnoo kodda jinnaaɓe mum : ko ɗuum tagi mo wiyeede kodda Aadama Ayse. Alaa fof ko ɓurnoo Umaar Saydu yiɗ- de yumma mum Aadama : saanga nde o wonnoo funnaange, omo heewnoo wiyde « mi woppii worɓe heewɓe nannduɓe e baaba am to Fuuta, kono mi woppaani (ɗalaani) toon nannduɓe e neene am ! » Umaar Saydu, nde o jibinaa nde, o tawi ko Fuuta Tooro ina woni e laamu almamaagal, Fuuta, ina woni nokku diine gila e dillere Tooroɓɓe nde Suleymaani Baal umminnoo e hitaande 1771. Umaar Saydu tawi ko Almaami Abdul Qaadiri ina mahi jamaaji, e duɗe, e nder gure Fuuta fof, ina ardini ɗum Elimaanuuji.
E oon sahaa mo o jibinaa, ko diine tan wonnoo e Fuuta, ko laawol Qaadiri ɓurnoo reweede. Baaba makko, hono Saydu Usmaan jeyaa ko e yontannde Sheex? Suleymaani Baal e Almaami Abdul Qaadiri, o tawtoraama yoga e dente (jonɗe) baɗanooɗe e nder Fuuta, hono ɗi kaalno ɗen e nder winndannde daartol Suleymaani Baal. Saydu Usmaan ko ceerno mawɗo wonnoo, omo lollunoo e wuro.
