Won winndannde njaltinno-ɗen e tonngoode 38 Fooyre Ɓamtaare, saawiyee 2007 tawi tiitoonde mum ko “Ilam geec nder Nuwaasoot jommbaani”. Wonaa haala ɓola, nde tuuginoo ko e wiɗtooji annduɓe. Hannde kadi, ɓeen annduɓe, nduttiima ina njeertina laamu ngu e yimɓe ko fayti e ɗuum. “Mbayliigu ngonka weeyo : Nuwaasoot ko ko hetaa.” E tonngol,ɗum tuugnii ko e wiɗto annduɓe Muritaninaaɓe : ina feeñi e ngoon wiɗto wonde nokkuuji keewɗi e wuro Nuwaasoot ko ilooji, tee ɗo hitaande 2020, yoga e majji ko naatooji, so tawii peeje juumtuɗe ƴettaaka. Ɗumɗoo, e wiyde makko “wonaa daarol, kono tuugii ko e wiɗtooji baɗaaɗi e nder ñalɗi (Atelier) baɗnooɗo e ɗeeɗoo balɗe to Otel Shingiti Palas, ɗo e Nuwaasoot”.
Ɓuri fooɗtude hakkillaaji fof noon ko daande geec o, hay so tawii nokkuuji goɗɗi ɗi fof cunnaama. Kono wonaa Nuwaasoot tan, hay Nuwaadibu daɗaani heen, tawi en kaalaani nokkuuji deenaaɗi, ko wayi Banndargin (Banc d’Arguin) e Jawling. E tuugaade e geɗe nanondiraaɗe ɗe ngalaa jeddi hannde, ɓeyadagol nguleeki ina saaboo ƴergol diƴƴe geecuuji fotde 15cm ɗo e hitaande 2020. Ɗum ɗoon noon so waɗii, leeɗe Nuwaasoot keewɗe naatat. Annduɓe ɓe ɓuri kollitii wonde leeɗe ɓurɗe hulaneede ko Sebka e El Miina. Tafrag Seyna e Riyaad e Daar Nayiim ndaɗaani heen kam enne. Ko nokkuuji ɓurɗi toowde ɗii tan kisata e ɗaam ilam : ko ɓuri heewde e Arafaat, Tusuniin e Teyyaaret. Wonande batte ɗaam ilam, oɗon mbaawi ruttaade e Fooyre Ɓamtaare tonngoode 38. Ko ɓuri haawnaade heen, ko laamu ngu jeertinaama ɗum gila hitaande 2000, kono alaa fof feere yuumtunde ƴetaa. Finnde mum ko laamu ngu ina jokki rokkitde leyɗe e galleeji e nokkuuji ilooji. ƴeru ko anndiraa “Sitee Mawiyaa”, daande geec. Socogim ina foti wondude hannde e ngaanumma. Firtaani noon ko haalaa ɗo ko haɗotaako, ina waawi faleede, so tawii peeje juumtuɗe ƴettaama gila e law.
Bookara Aamadu Bah
